KʼIANGA je kisindaya Jesús nga jao chjota xi xka̱ xi taon síjeson, ya kichó ya jngo naxinandáʼndí xi ya tíjnachrian Jerusalén. Jao chjota tjenngile xi kitsole: “Titjásʼaon ya naxinandáʼndí kʼoa jngo búrróʼndí koa̱nsjaino, chjójndaʼñó kʼoa nroakaonao”.

Kʼianga je kichokaole je búrró, tsakʼejnasonle Jesús. Kʼoa kui kikao ya Jerusalén, nga tiya chrianni. Nga je kichochrian ya naxinandá, nʼio nkjín chjota kiskoeya. Me ngatsʼi chjota nga tsakʼasje najñole xi yʼakjásonngʼa kʼoa tsakándale ya yandia. Kʼoati tjínkʼa xi yáxka̱jén tsakáyo, kʼoa nʼio kinchja nga kitso: “¡Niná katasíchikontʼain je rey xi jaʼainle Jeobá nroani!”

Je xi rey tjoe ngasʼa ya Israel, búrró tsakatiosonle nga jaʼasʼen ya Jerusalén nga katabe naxinandá. Kʼoa kui xi kisʼin je Jesús. Kʼoa kui tjíobakó je chjota xosíkjoan nga mele nga Jesús reyle koa̱n. Tonga lito ngatsʼi chjota nga kʼoasʼin koanmele. Kʼia ʼya xi tʼatsʼe jebi nga je kichó Jesús ya yo̱ngo̱.

Kisindaya Jesús je chjota xi xka̱ kao xi yo̱ma̱ ya yo̱ngo̱. Kʼianga tsabe je xtiʼndí xi tʼatsʼe jebi, nʼio kinchja nga tsakʼasjengʼa Jesús. Tonga koanjtile je naʼmi xi tʼatsʼe jebi, kʼoa kitsole Jesús: “A tinoʼyani jmeni xi tjíotso je xtiʼndí”.

Jesús kitso: “Jaon, a nikʼiajin tsakʼexkiao je Biblia jñani kʼoatso: «Ya tsʼoa xtiʼndí kʼoasjeni kjoajeya je Niná»”. Kʼoa je xtiʼndí xokjoan tosi tonda tsakʼasjejeya je rey xi kitsjoa Niná.

Kʼoati mená nga kʼoatisʼiaan tsandañá jokisʼin xtiʼndí jebi, a tsín jaon. Tsakui nichxin tjínkʼa chjota xi kʼoechjoaná nga tsínti kuinokjoañá xi tʼatsʼe Rey xi kiskoejin Niná. Tonga tosi tonda chjakoa xi kjaʼai tʼatsʼe kjoanda xi naskánatjín nroakaole chjota je Jesús.

Kʼianga tsakʼejna Jesús i̱ Sonʼnde a likʼiajin nichxinle nga koatexoma. Kʼiáni nga koatexoma. Je chjota tjenngile koanmele nga skoe. Kataʼyala xi tʼatsʼe jebi.