MꞌE̱FA de nuꞌmu̱ rä Hesu bi yꞌo̱the nuꞌu̱ yä zi me̱ti mi goda, rä Hesu bi ma pa ha nꞌa rä zi tꞌu̱kä hnini getbu̱ de Jerusalen. Rä Hesu bi ꞌñembäbi yoho de nuꞌu̱ yä de̱ni: “Ri mahu̱ pa ha nuni tꞌu̱kä hnini bi jani. Ha nu xki tso̱nihu̱ ma gi tinihu̱ nꞌa zi burru. Guä xoꞌtihu̱ ꞌne guä tsinkägihu̱”.

Nuꞌmu̱ bä tsꞌimpäbi näꞌä zi burru, rä Hesu bi hñutsꞌi, ꞌne bi ma pa Jerusalen, näꞌä hnini mi kohi getbu̱ de habu̱ mi yꞌo. Nuꞌmu̱ ya ma xä zo̱ni ha Jerusalen, bi bo̱ni xa ndunthi yä jäꞌi pa bi dädi. Ndunthi de nuꞌu̱ yä jäꞌi bi hñäki yä hee pa bi tu̱ngi ha ꞌñuu. Märꞌaa bi mogi yä de̱nthi ꞌne mi enä: “Jeoba dä jäpi nuni ndä xpä pe̱hni”.

Mäyaꞌmu̱ ha rä hnini Israel, yä rꞌayꞌo ndä mi ku̱tꞌi ha Jerusalen, ꞌne mi hutsꞌi ha nꞌa zi burru pa njabu̱ mi handi gatꞌho yä jäꞌi. Geꞌä bi me̱fi rä Hesu. Nuyu̱ yä jäꞌi gi handi ha rä kꞌoi udi ge hää mi ne ge rä Hesu xä ndä. Pe hingä gatꞌho yä jäꞌi mi mädi rä Hesu. Ma gä handihu̱ näꞌä bi thogi nuꞌmu̱ bi yꞌu̱tꞌi ha rä templo.

Ha rä templo, rä Hesu bi yꞌo̱the nuꞌu̱ yä jäꞌi mi goda ꞌne nuꞌu̱ hingä mi tsa dä ñꞌo. Yä zi bätsi bi nsunda rä Hesu nuꞌmu̱ bi hyandi näꞌä mi pe̱fi. Pe nuꞌu̱ yä majhä xa bi nkue̱, ꞌne bi ꞌñembäbi rä Hesu: “¿Hage hingi o̱de te mängä nuyu̱ yä bätsi?”.

Rä Hesu bi dädi: «Hää di o̱de. ¿Hixkä hñetihu̱ ha rä Mäkä Tꞌofo habu̱ enä: “Asta yä zi bätsi ma dä xo̱kämbeniꞌä”?». Hänge nuꞌu̱ yä zi bätsi bi sigi bi nsunda näꞌä ndä xpi pe̱hni Äjuä.

¿Hänge di ne gä njahu̱ ngu nuꞌu̱ yä zi bätsi? Rꞌa yä jäꞌi hingi ne dä hyandi gä udihu̱ de rä tsꞌu̱tꞌhui Äjuä. Pe nuju̱ ma gä sigi gä xipäbihu̱ märꞌaa de nuꞌu̱ yä tꞌo̱tꞌe xa mähotho ma dä me̱fi rä Hesu po yä jäꞌi.

Nuꞌmu̱ bi mꞌu̱i rä Hesu nuua ha rä Xiꞌmhai, tobe hingä xki zo̱ho̱ näꞌä pa pa xä mu̱di xä mända ngu nꞌa ndä. ¿Hämꞌu̱ ma xä zo̱ho̱ näꞌä pa? Nuꞌu̱ yä de̱ni mi ne dä bädi ꞌnehe. Ma gä sigi gä pädihu̱ de geꞌä.