POKO despues di a kura e dos limosneronan siegu, Hesus a yega na un pueblo serka di Yerusalèm. El a bisa dos di su disipelnan: ‘Bai na e pueblo i boso lo haña un buriku yòn. Lòs e i tres’é pa mi.’

Ora nan a trese e buriku, Hesus a sinta riba dje. Anto riba e buriku el a bai Yerusalèm, ku tabata keda ei serka. Ora el a yega serka di e stat, un multitut grandi di hende a sali pa risibié. Mayoria di nan a kita nan mantel i a pone nan riba kaminda. Otronan a kòrta rama di palma i a pone nan tambe riba kaminda. Nan a grita: ‘Dios bendishoná e rei ku ta bini den nòmber di Yehova!’

Den tempu di antigwedat e reinan nobo di Israel tabata drenta Yerusalèm sintá riba buriku pa e pueblo mira nan. Esei ta loke Hesus a hasi. I e pueblo a mustra ku nan tabata ke Hesus komo nan Rei. Pero no ta tur hende tabata kier e. Nos por mira esei dor di loke a sosodé ora Hesus a bai na e tèmpel.

Na e tèmpel Hesus a kura hende siegu i mankaron. Ora e muchanan a mira esei, nan a grita alabansa pa Hesus. Pero esei a pone e saserdotenan rabia, i nan a puntra Hesus: ‘Bo ta tende loke e muchanan ta bisa?’

Hesus a kontestá: ‘Sí. Boso no a lesa nunka den Beibel kaminda e ta bisa: “Dios ta laga alabansa sali for di boka di mucha?”’ P’esei e muchanan a sigui alabá e rei di Dios.

Nos ta deseá di ta manera e muchanan ei, no ta bèrdat? Algun hende lo por purba stroba nos di papia tokante e reino di Dios. Pero nos ta sigui bisa otro hende tokante e kosnan maravioso ku Hesus lo hasi pa hende.

Ora Hesus tabata riba tera no tabata tempu ainda pa e kuminsá reina komo rei. Na ki tempu esei lo sosodé? E disipelnan di Hesus a puntr’é meskos. Nos lo lesa tokante esei den e siguiente lès.

Mateo 21:1-17; Juan 12:12-16.