CHIʼ QʼAXNÄQ chi kebʼ oxibʼ qʼij che ri Jesús xukunaj ri kebʼ winaq kekaʼy täj, ri Jesús xpe pa jun alaj tinamit naqaj che Jerusalén. Xubʼij wariʼ che ri kebʼ rajtijoxel: ‹Chixok pa ri alaj tinamit chilaʼ kiriq jun alaj bʼur. Chikiraʼ loq tekʼuriʼ chikʼama lo chwe›.

Chiʼ xkekʼam lo ri bʼur, Jesús xkubʼi bʼik chirij. Tekʼuriʼ xbʼe Jerusalén, che kʼo naqaj. Chiʼ naqaj chik kʼo che ri tinamit, sibʼalaj e kʼi täq winaq xeʼel lo che rilik. Kʼi chike ri winaq xkeya täq atzʼyaq pa ubʼe. Nikʼaj chik xkeya täq uqʼabʼ cheʼ, xuqujeʼ xkebʼij: ‹¡Ri Ajawaxel chuya na tewchibʼäl che ri ajawinel che petinäq pa ubʼiʼ ri Jehová!›

Ojer pa Israel chiʼ kʼo jun kʼakʼ ajawinel kok bʼi pa Jerusalén puwiʼ jun bʼur rech kkil ri winaq rech ri tinamit. Are waʼ xubʼan ri Jesús. Xuqujeʼ wa täq winaq tijan kkekʼutu che kkaj che ri Jesús kubʼan ajawinel. Tekʼuriʼ konojel ta ri winaq kkaj wariʼ. Kqil na wariʼ su xbʼantajik chiʼ Jesús xopan pa ri loqʼalaj ja.

Pa ri loqʼalaj ja ri Jesús xeʼukunaj täq winaq che kekaʼy täj xuqujeʼ winaq che kamnäq kibʼaqil. Chiʼ ri alaj täq akʼalabʼ xkil wariʼ utz xechʼaw chirij ri Jesús. Wariʼ xubʼano che ri täq ajkojol tabʼal toqʼobʼ sibʼalaj xpe koyowal, o kiwal, rumal laʼ xkebʼij wariʼ che Jesús: ‹¿La kata ri tijan kkebʼij ri täq akʼalabʼ?›

‹Jeʼ kinto›, xchaʼ Jesús. ‹¿La isikʼim ta pa ri Loqʼalaj Pixabʼ che kubʼij: pa kichiʼ ri alaj täq akʼalabʼ ri Ajawaxel kuya utzalaj täq tzij?› Rumal laʼ ri täq akʼalabʼ xkeya ta kan ubʼixik utz täq tzij chirij ri ajawinel xuya ri Ajawaxel.

Öj kqaj kqabʼan junam kukʼ ri akʼalabʼ, ¿la jewaʼ? Weneʼ e kʼo täq winaq che kkaj kqaya kan uyaʼik ubʼixik ri tzij chirij ri ajawbʼäl rech ri Ajawaxel. Tekʼuriʼ öj rajawaxik kqaya ta kan ubʼixik chike ri winaq ri utzalaj täq jastaq che kubʼan na ri Jesús chike ri winaq.

Chiʼ Jesús kʼo cho ruwäch Ulew are ta ri qʼij che kok ubʼanik qʼatbʼaltzij. ¿Jumpaʼ kopan ri qʼij? Ri täq rajtijoxel xkaj xketaʼmaj. Chqasikʼij chirij wariʼ kimik.