Tantara 97

Natao Mpanjaka Jesosy

FOTOA kelikele tafara’ty nampahitàn’i Jesosy lahilahy jiky roe reny, le nandeha tamy tanà raike marinike an’i Jerosalema zay ie. Hoy ty asane tamy mpianatsine roe rezay: ‘Ndahàna nareo an-tanà ao. Hahita ampondra zay nareo laha fa avy ane. Vahào ie ka andeso bakao.’

Laha fa niavy tamine teo ampondra iny, le nitikitse tanabone teo Jesosy. Nandeha ta-Jerosalema ane ami’zay ie laha fa bakeo. Laha fa nihanarìny tanà iny ie, le nisy vahoake maro namonjy aze. Maro tamin’olo reo ro nangalake ty sikine ka namelatse aze tamy tany. Ty hafa nanampake sampan-kazo ka nataon-droze tamy tany teo kea, sady nikaikaike roze hoe: ‘Hotahì-Ndranahare lahy mpanjaka, avy amy anaran’i Jehovah io!’

Fa fomba’ty mpanjaka vaovao tamin’Israely eo taloha, ty miondra ampondra. Atorone ty olo iaby fa mpanjaka ie. Ka zay kea ty raha nataon’i Jesosy. Hita tamy raha nataon’olo reo kea, fa tean-droze ho mpanjaka Jesosy. Fe tsy ty olo iaby ro nitea aze. Ho hitantsika moa ty raha niseho laha fa nandeha tamy tempoly tao Jesosy.

Laha fa tamy tempoly tao Jesosy, le nanafake aretin’olo maro: nisy olo jiky nahita ndraike, nisy olo kolitsake kea nandeha soa. Laha fa nahita raha zay ajà kelikele tao reo, le nidera an’i Jesosy. Fe nampeloke mpisoro reny raha zay, ka hoy ty asan-droze tamin’i Jesosy: ‘Renao va raha volànin’ajà reo zao?’

‘Eka, reko soa zao’, hoy ty navalin’i Jesosy. ‘Mbo tsy novakìnareo tamy Baiboly tao va hoe: “Hatao-Ndranahare ze hiderà aze, ka baka ami’ty vavan’ajà kelikele ro hanaòva raha zay.” ’ Notohizan’ajà reny avao ty fideràn-droze mpanjaka-Ndranahare iny.

Tokone hanahake anak’ajà reny kea tsika, sa tsy zay? Maro ty olo manàka antsika tsy hanambara amin’olo hafa ty raha hatao’ty fanjakà-Ndranahare. Fe tsy hampijàno antsika raha zay. Tokone hazoto hanambara ty raha soasoa hataon’i Jesosy ho ahi’ty olo iaby amy hoavy tsika.

Mbo tsy fotoa tokone haha-mpanjaka an’i Jesosy, fotoa nandalòvane tan-tany etoy iny. Ombìa raha io vo ho avy? Tea’ty mpianatsin’i Jesosy ho hay raha io. Hovakìntsika tantara zay laha fa afara ao.

Matio 21:1-17; Jaona 12:12-16.