Makani 97: Jesu Waboola Kali Mwami
KWIINDE buyo mazuba masyoonto kuzwa naakaponya bantu batalangi balombelela bobilo, Jesu waboola kukanzi kalaafwiifwi a Jelusalemu. Waambila basikwiiya bobilo kuti: ‘Kamuya mumunzi mulajana mwana wambongolo. Mumwaangulule mundiletele.’
Bamuletele mwana wambongolo, Jesu wakkwela. Kumane weenda buyo aniini wasika mu Jelusalemu. Asike munsi aamunzi, bantu banji bazwa anze kumucinga. Bunji bwabo basuula zijansi zyabo akuzyiyala munzila. Bamwi bakwezyula malala. Azyalo eezyi bazyiyala munzila, kumane boongolola bati: ‘Leza muleleke mwami uuboola muzina lya Jehova!’
Kaindi mu Isilayeli bami bapya bakali kuunka mu Jelusalemu kabakkwelede amwana wambongolo kutegwa bakalitondezye kubantu. Eeci ncencico Jesu ncacita. Alimwi bantu aaba batondezya kuti bayanda kuti Jesu abe mwami wabo. Pele tabali bantu boonse bamuyanda. Tulakonzya kucibona eeci cacitika Jesu naaunka kutempele.
Kali atempele, Jesu waponya bantu batalangi abalema. Ibana babone ncaacita, balizya ngoloolo kulumbaizya Jesu. Pele eeci cabakalazya bapaizi, kumane bati kuli Jesu: ‘Hena uli bamvwide bana aaba ncobaamba?’
Jesu wavwiila wati: Inzya ndili bamvwide. Hena tamuna balide mu Bbaibbele ooko nkoliti: ‘Kuzwa kumilomo yabana baniini Leza uya kuleta ntembauzyo?’ Aboobo bana bazumanana kutembaula mwami wa Leza.
Tuyanda kuti tube mbuli bana aabo, hena tabusyi? Bantu balakonzya kutulesya kwaamba makani aabwami bwa Leza. Pele swebo tuna kuzumanana kwaambila bantu zintu zibotu Jesu nzyaya kucitila bantu.
Tiicakali ciindi ca Jesu cakutalika kulela kali mwami naakali anyika. Ino ndilili niciya kusika ciindi cakuti alele? Basikwiiya ba Jesu bayanda kuti bazyibe. Tulacibala eeci kumpela.
Matayo 21:1-17; Johane 12:12-16.
Mibuzyo
- Ncinzi Jesu ncaakabaambila basikwiiya bakwe naakaboola kukanzi kalaafwiifwi a Jelusalemu?
- Ncinzi cicitika acifwanikiso Jesu naasika munsi aamunzi wa Jelusalemu?
- Ncinzi bana ncibacita nibabona Jesu kaponya bantu batalangi abalema?
- Ncinzi Jesu ncaamba kubapaizi bakalade?
- Mbuti mbotukonzya kuba mbuli bana bakalumbaizya Jesu?
- Ncinzi basikwiiya ncobayanda kuzyiba?
Mibuzyo aimwi
- Bala Matayo 21:1-17.
Mbuti kunjila kwa Jesu mumunzi wa Jelusalemu kali Mwami mbokwakaindene akuzunda kwabasikalumamba bakuciindi cabana Loma? (Mt. 21:4, 5; Zek. 9:9; Flp. 2:5-8; Kol. 2:15)
Nciiyo nzi bana baniini ncobakonzya kwiiya kubana basankwa bana Isilayeli bakazubulula Intembauzyo 118 Jesu naakanjila mutempele? (Mt. 21:9, 15; Int. 118:25, 26; 2 Timo. 3:15; 2 Pita 3:18)
- Bala Johane 12:12-16.
Ciiminina nzi kubelesya malala bantu nkobakacita nibakamutambula Jesu? (Joh. 12:13; Flp. 2:10; Ciy. 7:9, 10)
Andiza Inga Mwaakkomanina Ayaaya
JESU—NENZILA, NGOKASIMPE, MBOBUUMI
Mwami Wanjila mu Jerusalemu Katantide Amwana Wambongolo
Wazuzikizya businsimi ibwakalembwa myaka iisika ku 500 yainda.
