NINA makgas xtitaxtunit akxni xkamapaksanit skiwayanin tiku nila xlakawanankgoy, Jesús milh kʼakgtum aktsu kachikin lakatsu kJerusalén. Kawaniy chatiy kstalaninanin: Katanutit kʼaktsu kachikin chu natekgsatit tantum xaskgataku burro. Kaxkuttit chu kakilaliminiw.

Akxni limikgolh xaskgataku burro, Jesús kgetawi. Chu xkgewilanalh alh kJerusalén xlakata ay lakatsuja xwi. Akxni talakatsuwilh anta kkachikin, lhuwa kristianos minkgolh makgamakglhtinankgoy. Lhuwa kristianos maktaktakgolh xlhakgatkan chu mamikgolh ktiji. Chu amakgapitsi mamikgolh mokgot chu pixlanka wankgoy: ¡Dios kasikulanatlawalh mapakgsina tiku mima anta kxtukuwani Jehová!

Makgasa, anta kʼIsrael akxni xtanukgoy xasasti mapakgsinanin kJerusalén xkgetawilakgoy xaskgataku burro xlakata nakakxilhkgoy kristianos xalak kachikin. Chu Jesús chuna tlawama. Chu uma kristianos limasiyakgolh pi lakgatikgoy xmapakgsinakan nawan Jesús. Pero ni putum kristianos lakaskinkgoy xmapakgsina nawan. Uma likatsiyaw xlakata tuku lalh akxni Jesús alh ktemplo.

Anta ktemplo, Jesús kamapaksay kristianos tiku nila lakawanankgoy chu tiku nila tatsuwikgoy. Akxni laktsu kamanan akxilhkgolh tuku Jesús xtlawama pixlanka malankikgoy. Pero sacerdotes lisitsikgolh chu wanikgoy Jesús: ¿Kgaxpata tuku kilhwamakgolh laktsu kamanan?

Kkgaxmatma wan Jesús. ¿Nikxni a likgalhtawakgayatit kBiblia niku wan: Dios natlaway pi xkilhni laktsu kamanan nalimalankinankgoy? Wa xlakata uma laktsu kamanan chuntiya malankimakgolh uma mapakgsina nema Dios wilinit.

Akinin nachuna wamputunaw la uma laktsu kamanan, ¿nixlikana? Max makgapitsi kristianos natlawaputunkgoy pi nialh nalichuwinanaw xlakata xtamapakgsin Dios. Pero akinin chuntiya nakawaniyaw amakgapitsi kristianos xlakata katuwa tuku lu tlan natlaway Jesús.

Akxni Jesús xminit kKatiyatni, niaxchan kilhtamaku xlakata natsukuy mapakgsinan. ¿Tukuya kilhtamaku natsukuy mapakgsinan? Xtamakgalhtawakgen xkatsiputunkgoy. Kakatsiw xlakata uma.