WARAY pag-iha katapos tambalon ni Jesus an duha nga buta nga makililimos, inabot hiya ha usa nga gutiay nga baryo nga hirani ha Jerusalem. Ginsidngan niya an duha han iya mga disipulo: ‘Kadto kamo ha baryo ngan hiaagian niyo an nati nga asno nga nakahigot. Hubara ito ngan dad-a ha akon.’

Han gindara kan Jesus an asno, sinakay hiya hito ngadto ha Jerusalem. Han hirani na hiya ha syudad, damu nga tawo an nagkagawas ha pagtapo ha iya. Ginhukas han kadam-an ha ira an panggawas nga bado ngan ginbitad ito ha dalan. An iba nanguha hin mga sanga han palma ngan iginbutang liwat ito ha dalan, ngan nagsinggit: ‘Ginbibendisyonan ni Jehova an hadi nga naabot ha Iya ngaran!’

Hadto nga panahon, an bag-o nga hadi ha Israel nasakay ha nati nga asno ngadto ha Jerusalem basi magpakita ha mga tawo. Ini an ginbuhat ni Jesus. Ngan ipinapakita hini nga mga tawo nga karuyag nira nga magin hadi nira hi Jesus. Kondi an iba diri naruruyag ha iya. Hibabaroan naton ini tungod han nahitabo han kinadto hi Jesus ha templo.

Ha templo, gintambal ni Jesus an mga buta ngan mga piang. Han nakita ini han kabataan, nagsinggit hira hin mga pagdayaw kan Jesus. Kondi, tungod hini nasina an mga saserdote, ngan nagsiring kan Jesus: ‘Nababatian mo ba an ginsisiring han kabataan?’

‘Oo,’ binaton hi Jesus. ‘Waray ba niyo mabasa an siring han Biblia: “Ha baba han kabataan maghahatag an Dios hin pagdayaw?”’ Salit padayon nga gindayaw han kabataan an hadi han Dios.

Karuyag naton magin pariho hito nga kabataan, diri ba? Bangin pugngan kita han iba ha pagsumat mahitungod han ginhadian han Dios. Kondi magpapadayon kita ha pagsumat ha iba mahitungod han mga urusahon nga pagbubuhaton ni Jesus ha mga tawo.

Han nakanhi hi Jesus ha tuna, diri pa adto panahon han iya paghadi. San-o maabot ito nga panahon? Karuyag ito hibaroan han mga disipulo ni Jesus. Hibabaroan naton ito ha sunod nga istorya.