Tantara 97

Jesosy Ampanjaka Navy

TSY ela tafaran’izy nampahivan̈a mpangataka gila aroe in̈y, Jesosy navy ta Betania, tanàna hely marikitry Jerosalema. Volan̈iny tamy mpianatranany aroe: ‘Mindao anarô mandeha an-tanàna, misy zanaka boriky mifehy zay an̈y. Vahà tadinany, baka iô indesa atỳ.’

Boriky io koa fa nazo, Jesosy nitenginy izy ziska ta Jerosalema. Izy tamy zen̈y tsy lavitry loatra Jerosalema. Izy koa fa navy marikitry tanàna, nisy olo marobe nitsena izy. Ankamaraozan-drô nan̈adoso lamban-drô ambelan̈a, baka iô namelatra zen̈y tamy lalan̈a. Sasany nanapaka sampan̈a kindro, baka iô raha io napetrakan-drô tamy lalan̈a koa. Volan̈in-drô: ‘Tahin’ny Zan̈ahary ampanjaka avy amin’an̈aran’i Jehovah!’

Taloha be tan̈y, izikoa fa misy ampanjaka vaovao tamin’Israely, izy mitenginy zanaka boriky mitety Jerosalema, beky hain’ny vahoaka. Zen̈y raha ataon’i Jesosy io. Raha ataon’olo aby io mivolan̈a fa irô man̈eky Jesosy atao ampanjakan-drô. Kanefa, tsy olo jiaby tia izy. Alaiva onon̈o fo Jesosy nandeha tamy tempoly in̈y.

Tamy tempoly tao Jesosy nampahivan̈a olo gila ndreky tsokilaka aby in̈y. Tsaiky madiniky aby io koa fa nahita raha nataony zen̈y, irô nihira. Mpisôron̈o aby io neloko naharen̈y zen̈y, ke irô nivolan̈a tamy Jesosy: ‘Ren̈inao raha volan̈in’ny tsaiky aby io?’

Jesosy namaly: ‘Ia, ren̈iko. Anarô ma tsiary namaky tan̈aty Baiboly tao fa: “Boaka amy vavan’ny tsaiky madiniky, han̈amezan̈a voninahitry Zan̈ahary?” ’ Ke tsaiky aby io mbala nihira fo.

Atsika koa tôkony man̈ano karaha zen̈y, sa karakôry? Olo sasany mety han̈ano raha, beky atsika tsy mikoran̈a mikasiky fanjakan̈an’ny Zan̈ahary eky. Kanefa, atsika tsy kivy mikoran̈a amin’olo fahagagan̈a jiaby nataon’i Jesosy.

Jesosy tamin’io mbala tsendriky ampanjaka nanjaka tambony tany. Ombian̈a fo izy manjaka? Mpianatra Jesosy aby io ti hahay raha zen̈y. Atsika hahita zen̈y amy fianaran̈atsika man̈araka.

Matio 21:1-17; Jaona 12:12-16.