UYU ni Yesu ninshi ali pa Lupili lwa Miolife. Aba abaume 4 abali nankwe batumwa bakwe. Pali Andrea na Petro munyina, e lyo na Yakobo na Yohane, munyina. E lyo ico ulemona pa muulu, litempele lya kwa Lesa mu Yerusalemu.

Apa paali ni pali cibili ninshi palipita inshiku shibili ukutula apo Yesu aniniine pa mpunda iinono pa kwingila mu Yerusalemu. Ilyo talaya pa lupili, ali pe tempele, apo bashimapepo bafwaile ukumwikata no kumwipaya. Lelo balitiinine ukumwipaya pantu abantu abengi balimutemenwe.

Yesu aebele bashimapepo ati: ‘Muli nsoka kabili muli bana ba nsoka!’ Abebele no kuti Lesa akabakanda pa fyabipa ifyo balecita. Pa numa, Yesu aile pa Lupili lwa Miolife, kabili abatumwa bakwe 4 batendeke ukumwipusha ifipusho. Bushe nawishiba ifyo balemwipusha?

Abatumwa baleipusha Yesu pa fintu ifya ku ntanshi. Balishibe ukuti Yesu ali no kufumyapo ifyabipa fyonse pa calo. Nomba ico balefwaya, kwishiba ilyo ali no kufumyapo ifyabipa. Ni lilali Yesu ali no kwisa na kabili ku kube Imfumu?

Yesu alishibe ukuti abasambi bakwe pa calo tabali no kumumona nga aisa na kabili pantu akaba ku muulu, uko teti bamumone. E ico Yesu aebele abatumwa bakwe ifintu fimo ifyali no kucitika pa calo ilyo akalateka mu muulu. Finshi fimo ifyo Yesu abebele?

Yesu abebele ukuti kukaba inkondo, abantu abengi bakalalwala, e lyo bambi bakalaba ne nsala. Abebele no kuti abantu bakalaipayana, kabili kukaba ne finkukuma ifikalamba. Yesu alandile no kuti imbila nsuma iya bufumu bwa kwa Lesa ikabilwa pano isonde ponse. Bushe ifi fintu filacitika? Ee filacitika! Kanshi ifi filanga fye ukuti Yesu aleteka mu muulu. Nomba line fye, ali no kufumyapo ifyabipa fyonse pa calo.