Stori 98: Antap Long Hil Blong Ol Oliftri
LONG pija ya, Jisas stap antap long Hil blong ol Oliftri. Fo man we oli stap wetem hem, hemia fo aposol blong hem. I gat Andru wetem brata blong hem Pita, mo Jemes wetem brata blong hem Jon. Biaen longwe, yu save luk haos blong God long Jerusalem.
Tu dei bifo, Jisas i sidaon long wan yangfala dongki, i raed i go long Jerusalem. Naoia, hem i Tusde, mo long eli moning, Jisas i go long haos blong God. Long ples ya, ol pris oli traem blong holem hem, oli wantem kilim hem i ded. Be oli fraet blong holem Jisas from we ol man oli laekem hem tumas.
Jisas i tok strong long ol lida blong skul ya, i se: ‘!Yufala i olsem snek! !Yufala i olsem pikinini blong snek stret!’ Nao Jisas i talem long olgeta se God bambae i panisim olgeta from ol rabis samting we oli mekem. Afta, Jisas i wokbaot i go antap long Hil blong ol Oliftri. Long ples ya, ol fo aposol ya blong hem oli askem kwestin long hem. ?Yu yu save wanem kwestin?
Ol aposol ya oli askem kwestin long saed blong fiuja. Oli save se Jisas bambae i finisim ol rabis fasin long wol ya. Be oli wantem save wetaem samting ya bambae i hapen. ?Wetaem Jisas bambae i kam King?
Jisas i save se taem hem i kambak bakegen, ol man blong hem long wol ya bambae oli no save luk hem wetem prapa ae blong olgeta. Hemia from we hem i stap long heven, mo ol man long wol ya oli no save luk wan man long heven. Ale, Jisas i talem long ol aposol blong hem, sam samting we bambae oli hapen long wol taem hem i rul olsem King long heven. ?Wanem ol samting ya?
Jisas i talem se bambae i gat ol bigfala faet, plante man bambae oli sik mo hanggri, bambae i gat fulap man blong kilim man mo man blong brekem loa, mo graon bambae i seksek bigwan. Jisas i talem tu se ol man blong hem bambae oli talemaot gud nius blong kingdom blong God long olgeta ples blong wol. ?Yumi luk ol samting ya long taem blong yumi? !Yes! Taswe, naoia yumi save se Jisas i stap rul long heven. I no longtaem, bambae hem i finisim ol rabis fasin long wol ya.
Matiu 21:46; 23:1-39; 24:1-14; Mak 13:3-10.
Ol Kwestin
- ?Long pija ya, weswan man hem i Jisas? ?Hu ya fofala man ya we oli stap wetem hem?
- ?Long haos blong God, ol pris oli traem mekem wanem long Jisas? ?Jisas i talem wanem long olgeta ya?
- ?Wanem kwestin we ol aposol oli askem long Jisas?
- ?From wanem Jisas i talem long ol aposol, sam samting we bambae oli hapen long wol ya taem hem i rul olsem King long heven?
- ?Jisas i talem se wanem samting bambae i hapen bifo we hem i finisim ol trabol long wol ya?
Sam narafala kwestin
- Ridim Matiu 23:1-39.
Baebol i soemaot se i stret blong yusum ol taetel taem yumi toktok wetem sam haeman blong wol. ?Be folem ol tok blong Jisas long Matiu 23:8-11, i stret blong yusum ol taetel blong leftemap man insaed long Kristin kongregesen? (Wok 26:25, NW; Rom 13:7; 1 Pita 2:13, 14)
?Ol Farisi oli mekem wanem blong traem blokem ol man oli no kam Kristin? ?Olsem wanem ol lida blong skul tede oli mekem samting we i klosap sem mak? (Mat. 23:13; Luk 11:52; Jon 9:22; 12:42; 1 Tes. 2:16)
- Ridim Matiu 24:1-14.
?Olsem wanem Matiu 24:13 i soem se i impoten blong stanap strong longtaem?
?Long Matiu 24:13, wanem mining blong tok ya “olgeta samting ya i finis” [“en,” long NW]? (Mat. 16:27; Rom 14:10-12; 2 Kor. 5:10)
- Ridim Mak 13:3-10.
?Wanem tok long Mak 13:10 i soem se i impoten tumas blong talemaot gud nius? ?Tok ya blong Jisas i mas mekem wanem long yumi? (Rom 13:11, 12; 1 Kor. 7:29-31; 2 Tim. 4:2)
