Maana 98nan

Oliviye kulu kan

YESU de filɛ oliviye kulu kunna. A ni cɛ naani minnu bɛ ɲɔgɔn fɛ, olu ye a ka cidenw ye. Andre ni a balimakɛ Piɛrɛ, ani Yakuba ni a balimakɛ Yuhana. I ɲɛ bɛ Jerusalɛm Alabatoso de la ja kan sanfɛla la yan.

A tile fila de filɛ ko Yesu yɛlɛnna falidennin kan ka don Jerusalɛm dugu kɔnɔ. An bɛ Taratadon de la. Sɔgɔma joona fɛ, Yesu taara Alabatoso la. Sarakalasebagaw tun b’a fɛ ka a minɛ, ka a faga, nka u siranna jama ɲɛ bawo mɔgɔw tun bɛ Yesu fɛ.

Yesu ko o diinɛ ɲɛmɔgɔw ma: ‘Aw sa ninnu, aw sa den ninnu!’ Yesu tilala k’a fɔ ko u ka kojuguw kosɔn, Ala bɛna u ɲangi. O kɔfɛ, Yesu nana Oliviye kulu kan. A ka ciden naani ye ɲininkali dɔw kɛ. I b’a dɔn u ye Yesu ɲininka min na wa?

Cidenw y’a ɲininka sinikow de la. U b’a dɔn ko Yesu bɛna kojugu bɛɛ ban pewu dugukolo kan. Nka, u b’a fɛ k’a dɔn o bɛna kɛ tuma min na. Yesu bɛna segin ka na masaya kɛ tuma jumɛn na?

Yesu tun b’a dɔn ko a bɛna segin ka na tuma min na, a nɔfɛmɔgɔ minnu bɛ dugukolo kan, olu tɛna se k’a ye tuguni, bawo a bɛna kɛ sankolo la. O kosɔn, a y’a fɔ u ye fɛn minnu bɛna kɛ dugukolo kan, tuma min na a bɛna masaya kɛ sankolo la. O fɛnw dɔw ye jumɛnw ye?

Yesu y’a fɔ ko kɛlɛbaw bɛna kɛ, ko mɔgɔ caman bɛna bana ani kɔngɔw bɛna kɛ, ko mɔgɔfaga bɛna juguya kosɛbɛ ani ko dugukoloyɛrɛyɛrɛbaw bɛna kɛ. Yesu y’a fɔ ko Ala ka masaya kibaru duman waajuli fana bɛna kɛ dugukolo yɔrɔ bɛɛ la. Yala an ɲɛ b’a la ko o kow bɛ ka kɛ an ka waati la wa? Ɔwɔ. O kosɔn, an bɛ se ka da a la ko Yesu bɛ ka masaya kɛ sankolo la. Yan ni dɔɔnin cɛ, a bɛna kojugu bɛɛ ban pewu dugukolo kan.

Matiyu 21:46; 23:​1-39; 24:​1-14; Marka 13:​3-10.