CHI wayuu saaʼukai tü uuchikat Olivos nia Jesús. Na nümaakana nia Andrés, Pedro, Santiago otta Juan. Tü piichi chakat nachiirua shia tü aʼwaajüleekat Maleiwa chaka Jerusalén.

Alatüsü 2 kaʼi süchikijee nüntüin Jesús naaʼu wanee püliiku. Süpülapünaa tü kaʼikat maatteoʼu chajachi nia suluʼu tü aʼwaajüleekat, eere nuʼutuneein aaʼin natuma na sacerdotekana. Mmotka naya süka alin Jesús napüla na wayuukana.

Müshi Jesús namüin na sacerdotekana: ‹¡Wüi jia otta süchon jia wüi!› Süsaleena naya tü kasa mojusü naainjakat naashin Jesús. Mapa nuʼunaka Jesús saaʼumüin tü uuchikat Olivos, nasakiraka nia na aluwataaushiikana. ¿Pütüjaa aaʼu kasa nasakiraka anain?

Nasakirüin nia sünain tü alatajatkat mapeena. Natüjaa aaʼu najaʼttirüinjatüin Jesús tü kasa mojusü saaʼukat tü Mmakat. Natüjawee aaʼu joujainjatüin tia. ¿Joujeechi nüntaka Jesús süpüla Aluwatawaa?

Nütüjaa aaʼu Jesús nnojoleechin neʼrüin nia na nikirajüinkana nüntapa nüchikuaʼa süka chainjachin nia sirumatuʼu. Sutuma tia, nüküjüin namüin na aluwataaushiikana tü kasa eeinjatkat Mmapaʼa nuluwataapa sirumatuʼu. ¿Kasa eeinjatka?

Eeinjatü atkawaa, ayuulii, jamü, kaainjalaa, akutkujaweerü maʼin tü mmakat otta aküjüneerü sainküin tü Mmakat süchiki nuluwataaya Maleiwa. ¿Eesü tia maaʼulu? ¡Aa! Aluwataashi Jesús maaʼulu chaaʼaya sirumatuʼu. Alüʼütsü süpüla najaʼttirüin tü kasa mojusü eekat Mmapaʼa.