INAI be Iesu Olive Ororona ai. Ia danu idia noho tatau 4 be ena aposetolo taudia. Idia be tadikaka rua Andrea bona Petero bona ma tadikaka rua Iamesi bona Ioane. Sisina daudau dekenai, Dirava ena dubu Ierusalema lalonai oi itaia diba.

Iesu be doniki latanai Ierusalema lalonai ia vareai negana amo dina rua idia ore vadaeni. Hari be Tuesday. Daba kahanai, Iesu be dubu dekenai ia lao. Unuseniai hahelaga taudia ese Iesu idia dogoatao toho idia alaia totona. To unai idia karaia totona idia gari badina taunimanima ese Iesu idia ura henia.

Iesu ese unai tomadiho gunalaia taudia ia gwauraidia: ‘Umui be gaigai bona gaigai natudia!’ Bena Iesu ia gwau edia kara dika ibounai dainai, Dirava ese idia do ia panisia. Gabeai, Iesu be Olive Ororona dekenai ia daekau, bena inai aposetolo taudia 4 ese idia nanadaia matamaia. Iesu dekenai idia henanadailaia gaudia oi diba, a?

Aposetolo taudia be gabeai do idia vara gaudia idia henanadailaia noho. Idia diba Iesu ese kara dika ibounai tanobada dekenai do ia haorea. To idia ura diba edena negai unai do ia vara. Edena negai Iesu do ia giroa mai King bamona ia lohia totona?

Iesu ia diba ia giroa mai neganai, tanobada dekenai ena murinai idia raka taudia ese ia do idia itaia lasi. Badina ia be guba dekenai do ia noho, bona unuseniai ia do idia itaia diba lasi. Unai dainai, Iesu be guba dekenai King bamona do ia lohia neganai, tanobada dekenai do idia vara gaudia haida be ena aposetolo taudia dekenai ia gwauraia. Unai gaudia haida be dahaka?

Iesu ia gwau tuari badadia do idia vara, taunimanima momo do idia gorere, hitolo, taravatu utua karadia do idia bada herea bona tano mareremarere badadia do idia vara. Danu, Iesu ia gwau Dirava ena basileia ena sivarai namona be tanobada ibounai dekenai do idia harorolaia. Unai gaudia be iseda nega lalonai idia vara noho, a? Oibe! Unai dainai ita daradara lasi, Iesu be hari guba dekenai ia lohia noho. Daudau lasi ia ese dika ibounai tanobada amo do ia kokia.