Jesus kOndundu yOmiṋinga
EHUNGI 98
Jesus kOndundu yOmiṋinga
INGWI oJesus kOndundu yOmiṋinga. Ovarumendu vane mbe ri puna ye ovaapostele ve. Owo omuangu nerumbi Andreas na Petrus, na wina oomuangu nerumbi Jakobus na Johanes. Indjina ondembeli ndji mai munika ngwina kokure.
Pa kapita omayuva yevari kombunda yaindu Jesus tja za nokukavira kokasinona okuhita mu Jerusalem. Oro Oritjavari. Rukuru meyuva ndi Jesus wa ri kondembeli. Ingo ovapristeri va kondjisa okukambura Jesus kutja ve mu zepe. Nungwari owo aave tira okutjita nao mena rokutja ovandu va suverere Jesus.
Jesus wa ruka ovanane vombongo yOvajuda mbo kutja: ‘Oweṋe ozonyoka norukwato rwozonyoka!’ Okuzambo Jesus we ve raera kutja Mukuru ma eta omberero ku wo mena roviṋa avihe ovivi mbi va tjita. Okuzambo Jesus wa ronda kOndundu yOmiṋinga, okutja ovaapostele vane mba ave utu okumupura omapuriro. Ove mo tjiwa kutja ovikwaye owo mbyaave pura Jesus?
Ovaapostele aave pura oviṋa ohunga noruyaveze. Owo aave tjiwa kutja Jesus ma yandeke omauvi ayehe kombanda yehi. Nungwari owo aave vanga okutjiwa kutja oruṋe oviṋa mbi tji mavi tjitwa. Jesus me ya ruṋe rukwao okuyekuhonapara otja Ombara?
Jesus aa tjiwa kutja ovemukongorere mbe ri kombanda yehi kamaave yenene okumumuna indu eye tji me ya rukwao. Orondu eye ma kakara meyuru, nowo kamaave yenene okumumuna ngunda e ri ngo. Okutja Jesus wa raera ovaapostele ve ohunga noviṋa tjiva mbi mavi tjitwa kombanda yehi indu eye tji ma honapara otja Ombara meyuru. Tjiva vyoviṋa mbi ovikwaye?
Jesus wa tja maku kara ovita ovinene, ovandu ovengi mave vere nokuṱondjara, ovitjitwa vyoutwe mavi vaza pondondo yokombanda nu maku kara omanyinganyingiro wehi omanene. Jesus wina wa hungira kutja ombuze ombwa ohunga nouhona waMukuru mai zuvarisiwa akuhe mehi. Eṱe twa rora okumuna oviṋa mbi amavi tjitwa moruveze rwetu? Otjingaperi! Nokutja eṱe matu yenene okukara nouatjiri wokutja Jesus nai u honapara meyuru. Moruyaveze rwopopezu eye ma yandeke omauvi ayehe kombanda yehi.
