DAYTOY ni Jesus idiay Bantay ti Olivo. Ti uppat a lallaki a kaduana isu dagiti apostolesna. Isuda da Andres, Pedro, Santiago ken Juan. Makitkitam kadi ti templo ti Dios idiay Jerusalem iti adayo?

Martes idi, dua nga aldaw kalpasan ti panaglugan ni Jesus a simrek iti Jerusalem iti urbon nga asno. Iti bigbigat dayta nga aldaw, kayat a tiliwen dagiti papadi ni Jesus tapno patayen. Ngem agbutengda a mangaramid iti daytoy ta kaykayat dagiti tattao ni Jesus.

Imbaga ni Jesus kadagidiay relihiuso a papangulo a dusaen ti Dios ida gapu kadagiti kinadakes nga aramidenda. Kalpasan dayta, simmang-at ni Jesus iti Bantay ti Olivo, ket rinugian dagitoy uppat nga apostoles ti nagsalsaludsod kenkuana. Kayatda a maammuan no kaano a pagpatinggaen ni Jesus amin a kinadakes ken umay manen nga agturay kas ari.

Ammo ni Jesus a dagiti pasurotna ditoy daga didanto makita inton umay manen. Ngamin ta isunto ti adda idiay langit. Gapuna imbaga ni Jesus kadagiti adalanna ti bambanag a mapasamakto ditoy daga inton agturturayen kas Ari idiay langit.

Kuna ni Jesus nga addanto dadakkel a gubgubat, adunto a tattao ti agsakit ken mabisin, dumakes unay ti krimen ken dadakkel a ginggined. Kuna pay ni Jesus a ti naimbag a damag ti pagarian ti Dios maikaskasabanto iti intero a daga. Makitkitatay kadin a mapaspasamak dagitoy iti tiempotayo? Wen! Ngarud makasigurotayo a ni Jesus agturturayen idiay langit. Iti mabiiten pagpatinggaennan amin a kinadakes ditoy daga.