JESUS oku li omutumba kOmhunda yEemono pamwe novayapostoli vaye vane ngaashi tu shi wete mefano olo. Omuyapostoli waye umwe oAndreas nomumwaina Petrus nosho yo Jakob nomumwaina Johannes. Etungo olo u wete pombada mefano omo, otembeli yaKalunga yomuJerusalem.

Opa li ashike pa pita omafiku avali okudja eshi Jesus a ile kuJerusalem a londa kondongi. Ongula yEtivali, Jesus okwa li a ya kotembeli. Fimbo a li oko, ovapristeri ova li tava kendabala oku mu kwata ve mu dipae. Ndele ova li va tila oku shi ninga, molwaashi ovanhu ova li ve hole Jesus.

Jesus okwa li a ula ovawiliki ovo velongelokalunga lOshijuda a ti kutya ovo ‘omayoka noludalo lomayoka.’ Opo nee, okwe va lombwela kutya Kalunga ote ke va handukila omolwoinima aishe ii ei va ninga. Okudja opo, Jesus okwa ya kOmhunda yEemono. Fimbo ve li oko, ovayapostoli ovo vane ova li va hovela oku mu pula omapulo. Mbela ou shi shii kutya ova li tave mu pula shike?

Ovayapostoli ova li tava pula shi na sha noinima yomonakwiiwa. Ova li ve shi shii kutya Jesus monakwiiwa ota ka xulifa po owii aushe kombada yedu. Ndelenee ova li va hala okushiiva kutya osho otashi ka ningwa naini. Onaini Jesus ta ka aluka e uye okupangela e li Ohamba?

Jesus oku shi shii kutya eshi ta ka aluka, ovashikuli vaye kombada yedu itava ka dula oku mu mona nomesho avo okomutwe. Itava ka dula oku mu mona, molwaashi ota ka kala meulu. Onghee hano, Jesus okwa li a lombwela ovayapostoli vaye shi na sha noinima imwe oyo tai ka ningwa kombada yedu eshi ta ka pangela e li Ohamba meulu. Imwe yomoinima oyo a li a lombwela ovahongwa vaye oilipi?

Jesus okwe va lombwela kutya otapa ka kala oita inene. Okwa ti yo kutya ovanhu vahapu otava ka kwatwa komikifi, navamwe otava ka fya ondjala. Ekaulonyanga otali ka hapupala neenghono notapa ka ningwa omakakamo edu manene. Jesus okwa ti yo kutya onghundana iwa youhamba waKalunga otai ka udifwa kongonga yedu alishe. Mbela oinima oyo otwe i mona tai ningwa pefimbo letu? Heeno, nomolwaasho ohatu dulu okukala noushili kutya paife Jesus ota pangele meulu. Mafiku ota ka xulifa po oukolokoshi aushe kombada yedu.