Esimwititi 98: PoNdundu zoMauzwe
OGU kuna kara Jesus poNdundu zoMauzwe. Vagara vane ava vana kara nage kuna kara vapositoli vendi. Awo kuna kara oAndiliyasa namumbyendi Peturusa, ntani oJakopo namumbyendi Johanesa. Ozo ono kumona posinano kuna kara ntembeli zaKarunga moJerusarema.
Pana piti mazuva gavali kutunda apa Jesus ga hwililire moJerusarema posindongigona. Ngesi Etivali. Kongurangura Jesus ka kara pontembeli. Okwina vapristeli kava heteke kukwata Jesus nokumudipaga. Nye awo kava tjira kuyirugana eyi morwa vantu kwa hara Jesus.
Jesus ta tumbura vampitisili woukerelikarunga vena asi: ‘One mazoka novana womazoka!’ Jesus yipo ga tente asi Karunga nga ka va tengeka koyininke yoyidona nayinye eyi va rugana. Konyima zeyi Jesus ta wiza poNdundu zoMauzwe, ano vapositoli vane ava tava tameke kumupura. Ono diva asi yinke vana kupura Jesus?
Vapositoli kuna kupura kuhamena yininke yokomeho. Awo vana diva asi Jesus nga ka hagekesa po maudona nagenye pevhu. Nye awo vana hara kudiva asi siruwoke ngayi horoka eyi. Siruwoke nga ka tengura hena Jesus a ya pangere ngaHompa?
Jesus ana diva asi vasikuli vendi pevhu kapi ngava vhura kumumona apa nga wiza hena. Morwa age nga kara meguru, ano awo kapi ngava vhura kumumona mwina. Jesus makura ta tantere vapositoli vendi yininke yimwe eyi ngayi horoka pevhu apa ana kupangera ngaHompa meguru. Yinke yininke yimwe eyi?
Jesus ta tanta asi ngapa kara yita yoyinene, ntani vantu wovanzi ngava vera nokufa nzara, noukorokotji ngau vhuka, ntani ngapa kara makankamo gevhu gomanene. Jesus ta tanta hena asi mbudi zongwa zouhompa waKarunga nazo ngava zi zuvhisa pevhu nalinye. Ose twa mona yininke eyi tayi horoka posiruwo setu ndi? Yimo! Kuvhura nye tu divilise nawa-nawa asi Jesus kuna kupangera meguru. Ntaantani tupu makura a ka hageke maudona nagenye pevhu.
Mateusa 21:46; 23:1-39; 24:1-14; Marukusa 13:3-10.
Mapuro
- Mefano, gupi ge po Jesus, ntani wolye vana kara kumwe nendi?
- Yinke va hetekere kurugana vapristeli Jesus montembeli, ntani yinke ga va tanterere?
- Yinke vana pura vapositoli Jesus?
- Morwasinke ana tanterere Jesus vapositoli vendi yininke yimwe eyi ngayi horoka pevhu apa nga pangera ngaHompa meguru?
- Yinke ana uyunga Jesus eyi ngayi horoka komeho nga hagekese po maudona nagenye pevhu?
Mapuro gokugwederera ko
- Resa Mateusa 23:1-39.
Nampili ngomu Matjangwa kulikida asi eruganeso lyoyitumbwisiso yomouzuni kuvhura kuwapera, yinke adi likida nonkango daJesus mwaMateusa 23:8-11 kuhamena eruganeso lyoyitumbwisiso yokulipandadekera mombungakriste?
Yinke va hetekere kuruganesa Vafalisayi mokukondera vantu mokukara Vakriste, ntani ngapi omu vampitisli womaukarelikarunga ava ruganesa nongendeseso dokulifana moyiruwo yanaina?
- Resa Mateusa 24:1-14.
Ngapi omu mulyo gedidimiko va gu nkondopeka mwaMateusa 24:13?
Yinke azi tanta nkango ezi “uhura” mwaMateusa 24:13?
- Resa Marukusa 13:3-10.
Nonkango musinke domwaMarukusa 13:10 adi likida ngenderera zokuzuvhisa mbudi zongwa, ntani ngapi nadi vhura nonkango daJesus kutukundama?
