MPANJI 98

HaMpidi yaOliveta

IWU diyi Yesu haMpidi yaOliveta. Amayala awana adiyi nawu hiyapostolu indi. Adi Anderi nimana kwindi Petulu, niYakoba nimana kwindi Yowanu. Yina diyu tembeli yaNzambi muYerusalema yiwunakumona kuna kwakulehi.

Munahiti dehi mafuku ayedi kufuma hendeleliyi Yesu hamwana kachimbulu. Hadiña haChiyedi. Nampinji yantetemena Yesu wadiña hatembeli. Kweniku atupristu akeñeleña kumukwata Yesu nawu amujahi. Ilaña atiyili woma wakumujaha muloña antu amukeña Yesu.

Yesu wayiteneni ana anlomboli jayipompelu nindi, ‘Enu atupela nianyana katupela!’ Dichi Yesu wahosheli nindi Nzambi wukayibabesha muloña wayuma yatama yejima yeliliwu. Hanyima yanichi Yesu hakwinza hewulu daMpidi yaOliveta, dichi dinu awa apostolu awana hiyakumwihula malwihu. Wuneluki malwihu anakumwihulawu Yesu?

Apostolu anakumwihula hayuma yakumbidi. Aneluki nawu Yesu wukakumisha kutama kwejima hanu hamaseki. Ilaña anakukeña kwiluka mpinji yikamwekana iyi yuma. Mpinjinyi yikenzayi cheñi Yesu nakuyula neyi Mwanta?

Yesu neluki nindi atumbanji twindi hamaseki hiyakatwesha kumumona neyi nenzi cheñiku. Muloña wakwila nawu yena wukekala mwiwulu, dichi wena hiyakatwesha kumumona nawaku. Dichi Yesu hakuyileja apostolu indi yuma yikwawu yikamwekana hamaseki hakayulañayi mwiwulu neyi Mwanta. Hiyumanyi yenoyu?

Yesu hakuhosha nindi kwakekala njita jamaneni, antu amavulu akakata, kwakekala ninzala, wubanji wukataminaku, nawa kwakela nyitentanshi yamaneni. Yesu hakuhosha cheñi nindi nsañu yayiwahi yawanta waNzambi akayishimwañena mwejima mwahita iseki. Komana tunakuyimona iyi yuma yinakumwekana mumafuku etu? Eña! Dichi tunatweshi kwiluka netu Yesu nakuyula mwiwulu. Katataka keña yakumishi kutama kwejima hamaseki.

Matewu 21:46; 23:1-39; 24:1-14; Maku 13:3-10.