HEl hi Olive Tlanga Isua a ni. A hnena mi palite hi a tirhkohte an ni. Andria leh Petera te unau leh Jakoba leh Johana te unau an ni. Sawta hla taka i hmuh saw Jerusalem-a Pathian biak in a ni.

Sabengtung no chunga chuanga Jerusalem-a Isua a luh achin ni hnih a ni tawh a. Thawhlehni a ni. Chumi ni hma chuan Isua chu biak inah a awm a. Chutah chuan puithiamten tihhlum turin Isua man an tum a. Mahse mipuiin Isua an duh avangin chu chu an ti ngam lo va.

Chung sakhaw hruaitute chu Isuan: ‘Nangni rulte leh rul thlahte u!’ tiin a ko va. Tin, thil tha lo an tih tawh zawng zawng avangin anmahni Pathianin a hrem ang tih Isuan a sawi a. Chumi hnuah chuan Isua chu Olive Tlangah a chho va, heng tirhkoh palite hian zawhna an zawt a. Isua chu enge an zawh i hria em?

Tirhkohte chuan nakin huna thil chanchinte an zawt a. Isuan leilunga that lohna zawng zawng a titawp dawn tih an hria a. Mahse chu chu engtikahnge a thlen dawn hriat an duh a. Engtikahnge Lalber nia awp turin Isua a lo kal leh ang?

A lo kal leh hunah leia amah zuituten amah an hmu thei dawn lo tih Isuan a hria a. A chhan chu, vanah a awm dawn a, chutah chuan amah chu an hmuh theih dawn loh vang a ni. Chuvangin Isuan vana Lalber nia a awp huna leilunga thleng tur thil thenkhat a tirhkohte a hrilh a. Chung thil thenkhat chu engte nge ni?

Isuan indopui nasa deuh deuhte a awm ang a, mipui tam tak dam lo leh riltamin an awm ang a, suahsualna a nasa em em ang; tin lirnghing nasa tak tak a awm ang tih a sawi bawk a. Isua chuan Pathian ram chanchin tha chu leilung hmun tinah hril a ni ang tih pawh a sawi a. Chung thilte thleng mek chu kan hunah hian kan hmu tawh em? Aw! Chuvangin Isuan tunah vanah a awp tawh tih kan hre chiang thei. Leilunga that lohna zawng zawng a titawp thuai tawh ang.