TA̱YÓʼO kúú ta̱ Jesús ta nu̱ú xi̱kí ña̱ naní olivo níndúʼura. Ta na̱ apóstolra kúú ku̱mí saá na̱ ndóʼo xíʼinra. Yóʼo níndúʼu ta̱ Andrés ñani ta̱ Pedro xíʼin ta̱ Santiago ñani ta̱ Juan. Ta veʼe káʼnu ña̱ túvi níndichi yóʼo kúú templo Ndióxi̱ ña̱ ñuu Jerusalén.

Xa̱u̱vi̱ ki̱vi̱ ni̱ya̱ʼa nani tá nda̱a ta̱ Jesús sa̱tá tí burro loʼo ña̱ ni̱ki̱ʼvira ñuu Jerusalén. Ta vitin ki̱vi̱ martes kúúña. Tá xi̱ta̱a̱n ki̱vi̱ saá ni̱xa̱ʼa̱n ta̱ Jesús templo. Yóʼo kúú nu̱ú ndu̱kú na̱ su̱tu̱ tiinnara ña̱ kaʼnínara. Soo ni̱yi̱ʼvína tiinnara chi ku̱a̱ʼání na̱ yiví kúni̱ xíni ta̱ Jesús.

ʼNdóʼó, se̱ʼe ko̱o̱ kúúndóʼ, káchi ta̱ Jesús xíʼin na̱ su̱tu̱. Ta ni̱ka̱ʼa̱nra xíʼinna ña̱ taxi Ndióxi̱ castigo ndaʼa̱na xa̱ʼa ña̱ kéʼéna ña̱ va̱ása va̱ʼa. Tándi̱ʼi nda̱kiʼin ta̱ Jesús ku̱a̱ʼa̱nra nu̱ú xi̱kí ña̱ naní Olivo tasaá ki̱xaʼá na̱ apóstol ndáka̱tu̱ʼunnara. ¿Á xíni̱ún ndáaña ni̱nda̱ka̱tu̱ʼunnara?

Ni̱nda̱ka̱tu̱ʼunnara xa̱ʼa ña̱ koo chí nu̱únínu. Xíni̱na chi ta̱ Jesús sandiʼi-xa̱ʼara ndiʼi ña̱ kini ña̱ íyo nu̱ú Ñuʼú yóʼo. Soo kúni̱na kunda̱a̱-inina ama kooña. ¿Ama kixi tuku ta̱ Jesús tasaá kixaʼára kaʼndachíñura?

Ta̱ Jesús kúnda̱a̱-inira chi na̱ ndíku̱n sa̱tára, na̱ ndóo nu̱ú Ñuʼú yóʼo, kǒo kivi kuninara tá ná kixi tukura. Saáchi chí ndiví koora, ta na̱ ndóo nu̱ú Ñuʼú yóʼo kǒo kivi kuninara. Na̱kán ni̱ka̱ʼa̱n ta̱ Jesús xíʼinna xa̱ʼa sava ña̱ʼa ña̱ koo nu̱ú Ñuʼú yóʼo tá ná kixaʼára kaʼndachíñura chí ndiví. ¿Ndáaña koo?

Ta̱ Jesús ni̱ka̱ʼa̱nra, kooní ku̱a̱chi ña̱ kaʼní-táʼanna, kooní kue̱ʼe̱, kooní so̱ko, kooní ña̱ ta̱an ta ku̱a̱ʼání ña̱ kini koo. Ta saátu ni̱ka̱ʼa̱nra ña̱ iníísaá ñuyǐví natúʼunna xa̱ʼa Tu̱ʼun Ndióxi̱. ¿Á xíniyó ndiʼi ña̱yóʼo tiempo vitin? Xínivayóña. Ta vitin kúnda̱a̱-iniyó ta̱ Jesús íyora chí ndiví ta kán xáʼndachíñura. Xa̱ku̱numí sandiʼi-xa̱ʼara ndiʼi ña̱ kini ña̱ íyo nu̱ú Ñuʼú yóʼo.