အဲဒါက ယေရှု။ သံလွင်တောင်ပေါ်မှာဖြစ်တယ်။ သူ့အနားကလူလေးယောက်ကတော့ သူ့တမန်တော်တွေ။ အန္ဒြေနဲ့ပေတရုတို့ ညီနောင်ရယ်၊ ယာကုပ်နဲ့ယောဟန်တို့ ညီအစ်ကိုရယ်ပေါ့။ ခပ်လှမ်းလှမ်းမှာ တွေ့ရတဲ့ဟာက ယေရုရှလင်မြို့မှာရှိတဲ့ ဘုရားသခင်ရဲ့ ဗိမာန်တော်ပဲပေါ့။

မြည်းကလေးစီးပြီး ယေရုရှလင်မြို့ကိုယေရှုဝင်တဲ့အချိန်နဲ့ဆိုရင် နှစ်ရက်ရှိပြီ။ အင်္ဂါနေ့ဖြစ်တယ်။ မနက်ပိုင်းမှာ ယေရှုဟာဗိမာန်တော်မှာရှိခဲ့တယ်။ အဲဒီမှာ ယဇ်ပုရောဟိတ်တွေက ယေရှုကိုဖမ်းပြီးသတ်ဖို့ကြိုးစားခဲ့ကြတယ်။ ဒါပေမဲ့လူတွေက ယေရှုကိုသဘောကျတဲ့အတွက် သူတို့မလုပ်ရဲကြဘူး။

အဲဒီဘာသာရေးခေါင်းဆောင်တွေကို ယေရှုက ‘မြွေဆိုးတွေ၊ မြွေဆိုးအမျိုးတွေ’ ဆိုပြီးခေါ်တယ်။ သူတို့လုပ်တဲ့ဆိုးရွားတဲ့ ဒုစရိုက်တွေအတွက် သူတို့ကိုဘုရားသခင်ဒဏ်ခတ်မယ် ဆိုပြီးတော့လည်းပြောတယ်။ အဲဒီနောက် ယေရှုဟာသံလွင်တောင်ပေါ်တက်သွားတယ်။ အဲဒီအခါ ဒီတမန်တော်လေးယောက်က ယေရှုကို မေးခွန်းအမျိုးမျိုးမေးကြတယ်။ သူတို့ဘာတွေ မေးသလဲသိလား။

တမန်တော်တွေက နောင်ရေးနဲ့ပတ်သက်ပြီးမေးနေကြတယ်။ ကမ္ဘာပေါ်ကဆိုးယုတ်တဲ့အရာအားလုံးကို ယေရှုသုတ်သင်ပစ်မယ်ဆိုတာကို သူတို့သိကြတယ်။ ဒါပေမဲ့ ဘယ်တော့လဲဆိုတာကိုသိချင်ကြတယ်။ ယေရှုဘုရင်အနေနဲ့ နောက်တစ်ကြိမ်ဘယ်တော့လာမလဲ။

နောက်တစ်ကြိမ်လာတဲ့အခါ သူ့တပည့်တော်တွေ သူ့ကိုတွေ့နိုင်မှာမဟုတ်ဘူးဆိုတာ ယေရှုသိတယ်။ ဘာကြောင့်လဲဆိုတော့ ယေရှုဟာ ကောင်းကင်မှာရှိနေမှာကိုး။ အဲဒီတော့ သူ့ကိုတပည့်တော်တွေက တွေ့နိုင်မှာမဟုတ်ဘူးပေါ့။ ဒါကြောင့်သူကောင်းကင်မှာဘုရင်အနေနဲ့ အုပ်ချုပ်တဲ့အခါ ကမ္ဘာပေါ်မှာ ဖြစ်ပျက်လာမယ့်အဖြစ်အပျက်တချို့ကို တမန်တော်တွေကိုယေရှုပြောပြတယ်။ အဲဒီအဖြစ်အပျက်တွေဟာ ဘာတွေလဲ။

ယေရှုက စစ်ကြီးတွေဖြစ်မယ်၊ လူတွေဖျားနာကြမယ်၊ အစားအသောက် ငတ်ပြတ်ကြမယ်၊ ရာဇဝတ်မှုတွေလည်း သိပ်သောင်းကျန်းမယ်၊ မြေငလျင်ကြီးတွေလည်းလှုပ်မယ်ဆိုပြီး ပြောပြတယ်။ ပြီးတော့ ကမ္ဘာတစ်ခွင်လုံးမှာ ဘုရားသခင်ရဲ့နိုင်ငံတော်သတင်းကောင်းကို ဟောကြပြောကြမယ်လို့လည်းပြောတယ်။ တို့ခေတ်မှာ ဒါတွေဖြစ်နေတာတွေ့ရပြီလား။ တွေ့တာပေါ့။ ဒါကြောင့်အခု ယေရှုဟာ ကောင်းကင်မှာအုပ်ချုပ်နေပြီဆိုတာ သေချာသိနိုင်တယ်။ မကြာခင် ကမ္ဘာပေါ်ကဆိုးယုတ်မိုက်မဲမှုအားလုံးကို စခန်းသိမ်းပစ်တော့မယ်။