YESU uze a li ha Muncinda ua Oliveta. Vaze vamala vauana va li navo vapostolo veni. Hali Anduleo na muanaye Petulu kaha hali naua Tiango na muanaye Yoano. Tembele ya Njambi ize ili na ku moneka kuze ku laako.

Mua hiti matangua avali fume ha kovelele Yesu mu Yelusalema oku na londa hali muana cimulu. Lia puile lia Citatu. Ku cimene Yesu na kele mu tembele. Kaha kuze vaFaliseo va tondele ku mu kuata linga va mu tsihe. Vunoni vakele na vuoma vua vantu muomu va lemene Yesu.

Kaha Yesu ua sanene vaze vakuluntu va vulombelo ngueni: ‘Enu manoka na vana va manoka!’ Kaha Yesu ua va lekele ngueni tangua Njambi aka va hana kasitiku omo lia viuma via vipi vi va kele na ku linga. Kaha mu nima yovio ngeci neza oku ku Muncinda ua Oliveta kaha va vapostolo vauana va putukile ku mu hula. Ua tantekeya vika va li na ku hula Yesu ni?

Vapostolo vali na ku mu hula viuma vika soloka ku lutue. Muomu va na tantekeya nguavo Yesu tangua aka huisa vupi vuose ha mavu. Vunoni va tondele mpundu ku tantekeya tangua lika viuma evi vika soloka. Tangua lika Yesu a keza linga aku pue Muangana?

Yesu ua tantekeyele ngueni tangua a keza naua ha mavu, vandongesi veni ka va ka hasa ku mu mona. Muomu ikeye a ka kala muilu ka va ka hasa naua ku mu mona. Ngeci mukemuo Yesu a li na ku lekesa vapostolo viuma vimo vika lingika ha mavu omo aka putuka ku sika ngue Muangana muilu. Viuma vika vimo via handekele?

Yesu a li na ku va leka ngueni ku ka kala zindzita, vantu va vengi va ka vavala kaha na ndzala na ku litsihanga, kaha ku ka kala naua mandunduma a kama. Yesu ua tualeleleho naua ku handeka ngueni muzimbu ua cili ua vuangana vua Njambi va ka u ambulula mu mavu ose. Tue ku mona evi viuma matangua ano ni? Eyo! Eci ci tu hana vusunga nguetu nkuma Yesu a li na ku sika muilu. Vuovuno aka fumisa vupi vuose ha mavu.