Tanojnots 98

Itech Olivojtepet

NEJIN takat yejua Jesús uan moajsi itech Olivojtepet. Naui takamej tein yetokej iuan yejuan itatitaniluan. Moajsij Andrés uan Pedro tein iknimej, Santiago uan Juan no iknimej. Ueyi kali tein moita ne uejka yejua itemplo Dios tein moajsi Jerusalén.

Panokaya ome tonal ijkuak Jesús kalakik Jerusalén ipan se asno. Katka martes. Nejon kualkan Jesús yetoya templo. Ompa tiopixkamej kinekiaj kikitskiskej uan kimiktiskej. Sayoj ika kimouilijkej porin taltikpakneminij kiniyolpaktiaya Jesús.

Jesús kintokaytij nejon tayekananij itech taneltokalis: ‘¡Kouamej uan imin koneuan kouamej!’ Ompa, kiniluij ika Dios kintatsakuiltiskia ika nochi amo kuali tachiualismej tein kichiujkaj. Satepan, Jesús pankisak itech Olivojtepet, uan ompa nejin naui tatitanilmej peuak kichiuiliaj netajtanilmej. ¿Tikmati toni?

Tatitanilmej kitajtanijtoyaj tein mochiuaskia miak xiujmej satepan. Kimatiaj ika Jesús kitamiskia nochi tein amo kuali tein mochiua nikan Taltikpak. Uan kimatisnekiaj kemanian eskia. ¿Kemanian oksepa ualaskia Jesús uan ijkon tayekanaskia kemej Tekiuaj?

Jesús kimatia ika nikan Taltikpak itatojtokakauan amo ueliskiaj kiitaskiaj keman oksepa ualaskia. Kemej yej yetoskia iluikak, yejuan amo ueliskiaj kiitaskiaj. Yejika, Jesús kiniluij itatitaniluan seki tachiualismej tein mochiujtoskiaj nikan Taltikpak, keman yej tekiuajtitoskia iluikak. ¿Katiyejuan eskiaj?

Jesús kijtoj ika onkaskia uejueyi neteuilmej, kokolismej uan mayan, onkaskia temiktilis uan talolinilis. No kijtoj ika motetapouiskia semanauak Taltikpak kuali tanauatilmej ika itekiuajyo Dios. ¿Tikitaj nochi nejin itech totonaluan? ¡Kemaj! Ueli tikyekmatij ika Jesús axkan tekiuajtitok iluikak. Amo uejkaua kitamis nochi tein amo kuali nikan Taltikpak.

Mateo 21:46; 23:1-39; 24:1-14; Marcos 13:3-10.