TLAPOUALISTLI 98

Itech Olivostepetl

NIKAN tikita Jesús yetok itech Olivostepetl. Naui tlakamej tlen katej iuan ye, itlatitlaniluan. Yejuan iknimej Andrés uan Pedro, uan iknimej Santiago uan Juan. Uan tlen moita, non iteokali toTajtsin Dios itech Jerusalén.

Yopanokej ome tonalmej ijkuak Jesús okalak itech Jerusalén ipan se burrojkonetl. Axkan okatka tonal martes. Achto, itech non tonal Jesús yokatka itech teokali. Ompa teopixkamej okinekiayaj kikitskiskej Jesús pampa kimiktiskej. Maski ijkon, yejuan omomojtijkej pampa tlaltikpaktlakamej okitlakaitayaj Jesús.

Jesús okinmilui nonmej tlayekankej teopixkamej: ‘¡Namejuan nankoamej uan naninkoneuan koamej!’. Ijkuakon, Jesús okinmilui toTajtsin Dios kintlajyouiltiskia pampa nochi tlamantli amo kuali tlen okichijkej. Satepan, Jesús otlejkok itech Olivostepetl, uan ijkuakon ninmej naui itlatitlaniluan opejkej kitlajtlania seki tlamantli. ¿Tikmati tlen okitlajtlanijkej?

Itlatitlaniluan okitlajtlanijkej tlen panoskia satepan. Yejuan okimatiayaj Jesús kitlamiskia nochi tlen amo kuali tlen mochiua itech Tlaltikpak. Maski ijkon, yejuan okinekiayaj kimatiskej keman mochiuaskia nochi non. ¿Keman oksepa uits Jesús pampa tlanauatis ken se ueyi Tekiua?

Jesús okimatiaya imachtijkauan tlen okatkaj itech Tlaltikpak amo uelis kitaskia ijkuak oksepa ualaskia. Nin ijkon panoskia pampa ye yetoskia itech iluikak, uan yejuan amo uelis kitaskia. Ik non, Jesús okinmilui itlatitlaniluan sekimej tlamantli tlen mochijtoskiaj itech Tlaltikpak ijkuak tlanauatijtoskia itech iluikak. ¿Katli sekimej tlamantli?

Jesús okijto mochiuaskiaj uejueyij guerras, miakej tlaltikpaktlakamej mokokoskiaj uan apismikiskiaj, yetoskia ouijkayotl uan chikauak tlaloliniskia. Noijki okijto motetlapouiskia itech nochi Tlaltikpak yankuik tlajtolmej itech iTekiuajkayo toTajtsin Dios. ¿Yotikitakej panotok nochi nin axan itech ninmej tonalmej? ¡Kema! Axkan melauak tikmatij Jesús yitlanauatijtok itech iluikak. Uan ayakmo miak poliui pampa Jesús kitlajtlamis nochi tlen amo kuali itech Tlaltikpak.

Mateo 21:46; 23:1-39; 24:1-14; Marcos 13:3-10.