GYISƐSE a de Ɔlivi Boka ne azo la. Mrenya nna ne mɔɔ boka ɔ nwo la le ye ɛdoavolɛma. Bɛmɛ a le Andelu nee ɔ diema Pita, yɛɛ Gyemise noko nee ɔ diema Dwɔn. Nyamenle ɛzonlenlɛ sua ne mɔɔ wɔ Gyɛlusalɛm la a ɛnwu ye wɔ nehane la.

Gyisɛse dɛnlanle asoaso ralɛ ne azo hɔle Gyɛlusalɛm la ye kenle nwiɔ ɛne. Ɛnee ɔle Dwɛkɛ. Kenle ne nwonlomɔ ɛnee Gyisɛse wɔ ɛzonlenlɛ sua ne anu. Wɔ ɛkɛ ne ɛsɔfo ne mɔ bɔle mɔdenle kɛ bɛkye Gyisɛse bɛahu ye. Noko akee bɛzulole kɛ bɛkɛyɛ ɛhye ɔluakɛ menli ne kulo Gyisɛse la ati.

‘Bɛmɛ nwɔlɛ nee nwɔlɛ mralɛ!’ Kɛ Gyisɛse vɛlɛle zɔhane ɛzonlenlɛ nu adekilevolɛma ne la ɛne. Akee Gyisɛse hanle kɛ Nyamenle bahwe bɛ nzo ɔlua ninyɛndane mɔɔ bɛyɛ la kɔsɔɔti ati. Yemɔ anzi Gyisɛse rale Ɔlivi Boka ne azo, na ɛzoanvolɛma nna ɛhye mɔ bɔle ɔ bo kɛ bɛbizebiza ye edwɛkɛ. Ɛze edwɛkɛ mɔɔ bɛlɛbiza Gyisɛse la ɔ?

Ɛzoanvolɛma ne ɛlɛbiza ninyɛne mɔɔ fane kenlebie anwo la. Bɛze kɛ Gyisɛse bava ɛtaneyɛlɛ muala ara awieleɛ wɔ azɛlɛ ye azo. Noko bɛkpondɛ kɛ bɛnwu mekɛ mɔɔ ɛhye kɛzi la. Mekɛ boni a Gyisɛse bara bieko arali tumi kɛ Belemgbunli a?

Ɛnee Gyisɛse ze kɛ ye ɛdoavolɛma mɔɔ wɔ azɛlɛ ye azo la ɛnrɛhola ɛnrɛnwu ye wɔ mekɛ mɔɔ ɔbara bieko la. Ɛhye le zɔ ɔluakɛ ɔbadɛnla anwuma, na bɛnrɛhola bɛnrɛnwu ye wɔ ɛkɛ ne. Yemɔti Gyisɛse hanle ninyɛne mɔɔ basisi wɔ azɛlɛ ye azo wɔ mekɛ mɔɔ ɔlɛdi Belemgbunli wɔ anwuma la bie mɔ anwo edwɛkɛ hilele ye ɛzoanvolɛma ne. Ninyɛne ɛhye mɔ bie mɔ a le boni?

Gyisɛse hanle kɛ konle mgbole basisi, menli dɔɔnwo anwo bado bɛ na ɛhɔne ahu bɛ, amumuyɛyɛlɛ bahɔ ɔ nyunlu, yɛɛ azɛlɛkpusulɛ mgbole basisi. Gyisɛse eza hanle kɛ bɛbabɔ edwɛkpa ne mɔɔ fane Nyamenle belemgbunlililɛ ne anwo la nolo wɔ azɛlɛ ye azo ɛleka biala. Asoo yɛnwu kɛ ninyɛne ɛhye mɔ ɛlɛsisi wɔ yɛ mekɛ ye azo? Ɛhɛe! Na ɛhye ati yɛkola yɛdie yɛdi kɛ kɛkala Gyisɛse ɛlɛdi tumi wɔ anwuma. Ɔnrɛhyɛ ɔbava ɛtaneyɛlɛ muala yeara awieleɛ wɔ azɛlɛ ye azo.