YA XÄ thogi yoho yä pa dende nuꞌmu̱ rä Hesu bi yu̱tꞌi ha Jerusalen. Nubye̱ mi geꞌä rä pa märte. Mi xudi, rä Hesu xki ñꞌo ha templo. Ja gehni yä majhä mi ne dä hyo rä Hesu, pe nuꞌu̱ bi ntsu ngeꞌä yä jäꞌi mi numäñho rä Hesu.

Rä Hesu bi ꞌñembäbi nuꞌu̱ yä majhä: “Nuꞌähu̱ gi njahu̱ ngu yä bätsi yä kꞌeñä”. ꞌNepu̱ bi xipäbi ge Äjuä ma dä kastiga po gatꞌho nuꞌu̱ yä tsꞌo tꞌo̱tꞌe xki me̱fi.

Mi ndee, rä Hesu bi bo̱tsꞌe pa ha rä tꞌo̱ho̱ de gä Olibo, ꞌne goho de nuꞌu̱ yä apostol bi uatꞌi rä Hesu. ¿Gi pädi toꞌo nuyu̱ yä apostol? Mi gehyu̱ Andres, Pedro, Santiago ꞌne Juan. Nuni to̱nꞌgu gi handi gehni rä templo Äjuä mi ja ha Jerusalen. Nuyu̱ goho yä apostol bi mu̱di bi japäbi yä ntꞌani. ¿Gi pädi te bi yꞌambäbi?

Yä apostol bi yꞌambäbi rä Hesu te ma dä thogi mꞌe̱fa. Nuꞌu̱ mi pädi ge rä Hesu ma dä huati gatꞌho nuꞌu̱ yä tsꞌo tꞌo̱tꞌe di neki ha rä Xiꞌmhai. Pe yä apostol mi ne dä bädi hämꞌu̱ ma xä zo̱ho̱ näꞌä pa. ¿Hämꞌu̱ ma dä ehe mänꞌaki rä Hesu pa dä mända ngu nꞌa Ndä?

Rä Hesu mi pädi ge nuꞌu̱ yä de̱ni ꞌmu̱i ha rä Xiꞌmhai hingä ma xä za xä hyandi nuꞌmu̱ xti ehe mänꞌaki. Ngeꞌä rä Hesu ma dä mända dende mähetsꞌi. Hänge bi xipäbi yä apostol te mä tꞌo̱tꞌe ma xä neki ha rä Xiꞌmhai, nuꞌmu̱ rä Hesu xä mu̱di xä mända ha mähetsꞌi. ¿Te mä tꞌo̱tꞌe ma xä neki?

Rä Hesu bi mää ge ma xä neki yä däta tuhni, yä hñeni, yä thuhu, yä däta mbiꞌmhai ꞌne ge yä jäꞌi ma xä ñho. ꞌNehe bi mää ge ma xä tꞌungä ntꞌo̱de ha gatꞌho rä Xiꞌmhai nuꞌu̱ yä rꞌayꞌo hogä noya de rä tsꞌu̱tꞌhui Äjuä. ¿Di neki mäpaya nuya yä tꞌo̱tꞌe? ¡Hää! Di pädihu̱ ge rä Hesu ya bi mända ha mähetsꞌi, ꞌne nguntꞌä ma dä huati gatꞌho nuꞌu̱ yä tsꞌo tꞌo̱tꞌe di neki ha rä Xiꞌmhai.