HIA es Jesus opp dän Oliewenboajch. Hee es met vea von siene Apostel toop. Daut sent Andreas un dän sien Brooda Petrus un Jakobus un sien Brooda Johanes. Dort hinja kaust du Gott sienen Tempel en Jerusalem seenen.

Twee Doag trigj wia Jesus opp dän jungen Äsel no Jerusalem jeräden. Nu wia daut aul Dinjsdach. Ea em Dach wia Jesus em Tempel jewast. Doa hauden de Priestasch Jesus wult faustnämen un am dootmoaken. Oba dee hauden sikj daut nich jewoacht, wiels daut Volkj Jesus jleicht.

Jesus haud to de judische Leidasch jesajcht: ‘Jie sent Schlangen un de Säns von Schlangen!’ Hee haud an uk jesajcht, Gott wudd an fa aul daut schlajchte bestrofen, waut see jedonen hauden. Nodäm wia Jesus hia opp dän Oliewenboajch noppjegonen un de vea Apostel fungen aun, am Froagen to stalen. Weetst du, waut see Jesus fruagen?

De Apostel wullen weeten, waut noch mol komen wudd. See wisten, eenen Dach wudd Jesus met aul daut schlajchte oppe Ieed een Enj moaken. Oba see wullen weeten, wanea daut wudd sennen. Wanea wudd Jesus wadakomen un aus Kjennich rejieren?

Jesus wist, daut siene Nofolja oppe Ieed am nich wudden seenen kjennen, wan hee wadakjeem. Hee wudd dan em Himmel sennen, wua hee nich wudd to seenen sennen. Doawäajen vetald Jesus siene Apostel, waut daut oppe Ieed jäwen wudd, wan hee ieescht wudd em Himmel aus Kjennich rejieren. Waut wudd daut sennen?

Jesus säd, daut wudd groote Kjriej jäwen un väle Menschen wudden krank woaren un hungren motten. Daut wudd uk groote Ieedbäben jäwen un de Menschen wudden väl schlajchtet aunrechten. Jesus säd oba uk, daut de goode Bootschoft von Gott sien Kjennichrikj wudd äwaraul oppe Ieed jeprädicht woaren. Kjenn wie seenen, daut dit aules vondoag passieet? Jo, wie kjennen. Doawäajen weet wie, daut Jesus nu aul aus Kjennich em Himmel rejieet. Boolt woat hee met aul daut schlajchte hia oppe Ieed een Enj moaken.