KO IESU teia i runga i te Maunga i Oliveta. Ko te tangata e a i ko iaia ko tana au apotetoro. Ko te teina tuakana ko Anederea e Petero, e te teina tuakana katoa ko Iakobo e Ioane. Ko te iero tera o te Atua i Ierusalema taau e kite mamao atura.

Kua pou e rua ra i te aere anga a Iesu ki Ierusalema na runga i tetai atini ou. E Ruirua teia ra. I mua atu i taua ra ra no ko a Iesu i te iero. I reira kua tauta te au taunga i te opu ia Iesu kia ta iaia. Inara kua mataku ratou i te rave i teia no te mea e reka ana te tangata ia Iesu.

‘E ovi kotou e e au tamariki na te ovi!’ i kapiki ei a Iesu i taua aronga arataki akonoanga ra. I reira kua akakite atu a Iesu e ka akautunga te Atua ia ratou no te au apinga kino pouroa ta ratou i rave. Muri ake i te reira kua aere mai a Iesu ki runga i te Maunga i Oliveta, e i reira teia au apotetoro toko a i akamata ai i te ui atu kiaia i tetai au uianga. Kua kite koe e eaa ta ratou i ui atu kia Iesu?

Kua ui te au apotetoro no runga i te au mea i te tuatau ki mua. Kua kite ratou e ka takore a Iesu i te au kino pouroa i runga i te enua. Inara kua inangaro ratou i te kite e aea teia e tupu ei. Aea a Iesu e oki akaou mai ei e tutara ei Ariki?

Kua kite a Iesu e ko tana au pipi i runga i te enua kare e kite mata iaia me oki akaou mai aia. No te mea tei runga aia i te rangi, e kare ratou e kite iaia i reira. No reira a Iesu i akakite ei ki tana au apotetoro i tetai au apinga te ka tupu i runga i te enua me tutara aia ei Ariki i runga i te rangi. Eaa tetai o teia au apinga?

Kua karanga a Iesu e ka tupu te au tamaki mamaata, ka makiia e ka pongi te au tangata e manganui, ka tupu te au angaanga kino, e ka tupu te au ngaruerue enua mamaata. Akakite katoa a Iesu e ka tutu aereia te tuatua meitaki o te patireia o te Atua i te au ngai ravarai i runga i te enua. Kua kite ainei tatou i teia au apinga i te tupu anga i to tatou tuatau? Ae! No reira ka papu ia tatou e te tutara ra a Iesu i teianei i runga i te rangi. Kare e roa atu ka akakore aia i te au tu kino pouroa i runga i te enua.