UYU ndi Yezu pa Phiri ya Milivera. Amuna anai ali na iye ndiwo apostolo ace. Ndiwo Andrea na Pedru akuti ndi ubale wawo, na Yakobo na Juwau akuti ndi ubale wawombo. Ire inakwanisemwe kuona kule ndi templo ya Mulungu m’Yerusalemu.

Pakhadapita ntsiku ziwiri kubulukira padakwira Yezu mwana buru mbapita m‘Yerusalemu. Cikhali Cipiri. M’ntsiku ineire ene Yezu akhali ku templo. Kweneko anyantsembe ayesera kuphata Yezu towera kumupha. Mbwenye iwo akhagopa kucita pyenepi thangwi mbumba ikhafuna Yezu.

Yezu acemera atsogoleri ale arelijiau: ‘Imwe zinyoka na ana azinyoka!’ Buluka penepo Yezu alonga kuti Mulungu mbadadzaalanga thangwi ya pinthu pyakuipa pyonsene pikhacita iwo. Patsogolo pace Yezu akwira ku Phiri ya Milivera, na apostolo aneale anai atoma kuncita mabvunzo. Kodi musadziwa kuti iwo abvunzanji kwa Yezu?

Apostolo abvunza pinthu pya ntsogolo. Iwo akhadziwa kuti Yezu mbadadzamalisa uipi onsene pa dziko yapantsi. Mbwenye iwo akhafuna kudziwa kuti pinthu pyenepi mbipidacitika lini. Kodi Yezu anadzabwera pontho lini kudzatonga ninga Mambo?

Yezu akhadziwa kuti atowereri ace pa dziko yapantsi nee mbadadzakwanisa kumuona pakubwera kwace pontho. Thangwi iye mbadakhala kudzulu, na iwo nee mbadadzakwanisa kumuona kweneko. Natenepa Yezu apanga apostolo ace pinthu pingasi pyakuti mbipidacitika pa dziko yapantsi munadzatonga iye ninga Mambo kudzulu. Kodi pinthu pingasi pya ipyo ndi pipi?

Yezu alonga kuti mbukudakhala nkhondo zikulu, anthu azinji mbadadzaduwala na kukhala na njala, na upandu mbudadzaipa kakamwe, na mbukudadzakhala piteketeke pikulu. Yezu alonga pontho kuti mphangwa zadidi za umambo wa Mulungu mbizidamwazwa konsene kwene m’dziko yapantsi. Kodi ife tisaona pinthu pyenepi mbipicitika m’nzidzi wathu? Inde! Natenepa tingakwanise kukhala na cinyindiro cakuti Yezu akutonga cincino kudzulu. Mwakukhonda dembuka iye anadzamalisa uipi onsene pa dziko yapantsi.