XA̱BU̱ bugi̱ nindxu̱u̱ Jesús bi̱ xtáa náa kúbá rí mbiʼyuu Olivos. Ajkhu̱u̱n xa̱bekha bi̱ xtáa gajmíi̱n nindxu̱ún apóstoles ndrígóo. Andrés ga̱jma̱a̱ ndxájuu bi̱ mbiʼyuu Pedro, xúʼko̱ má Santiago ga̱jma̱a̱ ndxájuu bi̱ mbiʼyuu Juan. Guʼwá rí nakujmaa mitsinguánʼ nindxu̱u̱ templo ndrígóo Dios dí rígá náa Jerusalén.

Ninújngoo má a̱jma̱ mbiʼi asndu nákha Jesús nito̱ʼo̱o̱ náa Jerusalén ga̱jma̱a̱ mbáa burru. Nindxu̱u̱ mbóo mbiʼi martes. Mbóo mbiʼi ginii Jesús nixtáa náa templo. Ikhí ndxajkun nigíiʼ murtuwiin Jesús mu muxiyáa. Mú nimiñun gurtuwiin, numuu rí xa̱bu̱ nandún kuyáá Jesús.

Jesús nixná mbiʼñún xa̱bu̱ ede̱ buʼko: ‹¡A̱bu̱nʼ, e̱jín a̱bu̱nʼ ñajuala!›. Ikhú Jesús niʼthí rí Dios makuʼma castigo náa ikhiin numuu rí nuni dí ra̱májánʼ. Nda̱wa̱á Jesús natsimuu náa kúbá rí mbiʼyuu Olivos, ga̱jma̱a̱ ikhú a̱jkhu̱u̱n apóstoles bugi nigi̱ʼdi̱i̱ niraxi̱. Lá natayáá ndiéjunʼ ñajunʼ graxe̱ ráʼ.

Apóstoles kuwa ruraxi ndiéjunʼ gárígá nda̱wa̱á. Nduyáá rí Jesús maʼni gámbóo xúgíʼ dí ra̱májánʼ dí rígá náa tsu̱du̱u̱ Ku̱ba̱ʼ. Mú nandún mbuyáá nguáná garígá rígi̱. Nguáná gáʼkha̱ Jesús mbu̱júu̱ mu maʼtáñajunʼ xóo Rey rá.

Jesús ndaʼyoo rí xándoo gúyáá xa̱bi̱i̱ índo̱ gáʼkha mbu̱júu̱ náa tsu̱du̱u̱ Ku̱ba̱ʼ. Xándoo gúyáá numuu rí ikhaa maxtáa mekhuíí. Ikha jngó, Jesús naʼthún apóstoles tikhuu dí marigá náa tsu̱du̱u̱ Ku̱ba̱ʼ índo̱ ikhaa gáxtáa raʼtañajunʼ mekhuíí. Ndiéjunʼ ñajunʼ tikhuu rá.

Jesús niʼthí dí marigá wéñuʼ guerra, makuwá mbaʼin wéñuʼ xa̱bu̱ bi̱ maʼniún nandii, marigá ewiʼ, marigá mbaʼa delito ga̱jma̱a̱ maʼxma wéñuʼ. Ma̱ngaa niʼthí rí ajngáa rí májánʼ ga̱jma̱a̱ numuu reino ndrígóo Dios miʼtáraʼa náa xúgíʼ tsu̱du̱u̱ Ku̱ba̱ʼ. Lá kuwáanʼ ruʼyáá xúgíʼ rígi̱ rí mbiʼi xúgi̱ ráʼ. ¡Xúʼko̱! Nduʼyáá gajkhun rí mbiʼi xúgi̱ Jesús xtáa raʼtáñajunʼ mekhuíí. Nacha̱ má maʼni gámbóo dí ra̱májánʼ dí rígá náa tsu̱du̱u̱ Kuba̱ʼ.