ONU nuwe Yesu ha rusozi rwa zeituni. Abasaija bbana abali nawe bakwenda be. Nibo Andereya na mugenzi we Petero, kandi na Yakobo na mugenzi we Yohana. Egyo ey’orukurora nseri ni yekaru ya Ruhanga mu Yerusalemu.

Hahingwireho ebiro bibiri kuruga Yesu ataaha mu Yerusalemu atembere enkaina ento. Kiri Kyakabiri. Nyenkya kara ekiro ekyo Yesu akaba ali mu yekaru. Oku banyakatagara bakalengaho kumukwata n’okumwita. Baitu bakatiina kukora kinu habwokuba abantu bagonza Yesu.

‘Inywe enjoka kandi abaana b’enjoka!’ Yesu nukwo yayesere abakuru b’ediini abo. Nubwo yesu abagamba ngu Ruhanga naija kubafubira habw’ebibi ebyo byona ebi bakozere. Hanyuma yebyo Yesu yatemba ha Rusozi rwa zeituni, kandi nubwo abakwendabe banu abbana batandika kumukaguza ebikaguzo. Omanyire eki barukukaguza Yesu?

Abakwenda nibakaguza ha biribaho mubwire bw’omu maiso. Bamanyire ngu Yesu naija kumarraho kimu obubi bwoona hansi. Baitu nibagonza bamanye ddi kinu obukiribaho. Yesu aligaruka ddi kulema nk’Omukama?

Yesu akimanyire ngu abakurasibe be ab’omu nsi tibalisobora kumurora obwaligaruka. Kinu kiri kiti habwokuba uwe aliba mwiguru, kandi tibalisobora kumurora haali. Nahabwekyo, Yesu agambira abakwenda be ebimu ha bintu ebiribaho omu nsi obwaliba nalema nk’omukama omwiguru. Ebimu hali binu nibyo biha?

Yesu agamba ngu halibaho obulemu bw’amaani, abantu baingi baliba barwaire, kandi baliba n’enjara, obwemi buliba bwingi, kandi halibaho emisisa y’amaani. Yesu ayongera agamba ngu amakuru amarungi agarukukwata ha bukama bwa Ruhanga galitebezebwa munsi yoona. Titurukurora ebintu binu nibihikirizibwa mu busumi bwaitu? Ego mali! Ego nitusobora kukigumya ngu Yesu hati nalema omwiguru. Bwangu naija kwihaho obubi bwoona omu nsi.