Uyu ndi Yesu e kha Thavha ya Miṱwari. Vhanna vhana vha re nae ndi vhaapostola vhawe. Ndi murathu na mukomana Andrea na Petro, na murathu na mukomana Yakobo na Yohane. Iḽa ndi thembele ya Mudzimu i re Yerusalema ine na nga i vhona fhaḽa kule.

Ho vha ho no vha maḓuvha mavhili u bva tshee Yesu a dzhena Yerusalema o namela mbongola. Ḽo vha ḽi Ḽavhuvhili. Nga matsheloni a hone Yesu o vha o ya thembeleni. Henengei a vhudza vhotshifhe uri Yehova o vha a tshi ḓo vha ṱarafela zwivhi zwe vha ita. Vhotshifhe vha lingedza u mu fara uri vha mu vhulahe. Nga murahu Yesu a gonya kha Thavha ya Miṱwari, zwenezwo avha vhaapostola vhana vha thoma u mu vhudzisa dzimbudziso.

Vhaapostola vho vha vha tshi khou vhudzisa nga ha tshifhinga tshi ḓaho. Vho vha vha tshi zwi ḓivha uri Yesu u ḓo fhelisa vhuvhi kha ḽifhasi. Fhedzi vho ṱoḓa u ḓivha uri zwo vha zwi tshi ḓo itea lini. Yesu o vha a tshi ḓo dovha a ḓa lini u vhusa sa Khosi?

Yesu o zwi ḓivha uri vhatevheli vhawe kha ḽifhasi vho vha vha sa nga koni u mu vhona musi a tshi vhuya hafhu, ngauri o vha a tshi ḓo vha e ṱaḓulu. Ngauralo Yesu a vhudza vhafunziwa vhawe zwiṅwe zwa zwithu zwe zwa vha zwi tshi ḓo vha zwi tshi khou itea kha ḽifhasi musi a tshi khou vhusa sa Khosi ṱaḓulu. Zwiṅwe zwa izwi zwithu ndi zwifhio?

Yesu o ri hu ḓo vha na dzinndwa khulu, vhathu vhanzhi vha ḓo lwala vha vha na nḓala, vhuvemu vhu ḓo vha vhuvhi, nahone hu ḓo vha na midzinginyo mihulu. A dovha a ri mafhungo maḓifha nga ha muvhuso wa Yehova a ḓo ḓivhadzwa hoṱhe kha ḽifhasi. Naa ro no vhona izwi zwithu zwi tshi khou itea tshifhingani tshashu? Ee! Ngauralo ri nga khwaṱhisa uri Yesu u khou vhusa zwino ṱaḓulu. Nga u ṱavhanya u ḓo fhelisa vhuvhi kha ḽifhasi.

Mateo 21:46; 23:1-39; 24:1-14; Marko 13:3-10.