INI hi Jesus ha Bukid han mga Olibo. An upat nga lalaki nga iya kaupod, iya mga apostol. Hira an magbugto nga hi Andres ngan hi Pedro, ngan an magbugto nga hi Jakobo ngan hi Juan. An nakikita ha ira luyo amo an templo han Dios ha Jerusalem.

Duha na ka adlaw katapos nga sinakay hi Jesus ha nati nga asno han kinadto hiya ha Jerusalem. Martes adto. Temprano hito nga adlaw kinadto hiya ha templo. Didto an mga saserdote nangalimbasog ha pagdakop ha iya basi patayon hiya. Kondi nahadlok hira ha pagbuhat hito tungod kay karuyag han mga tawo nga magin hadi hi Jesus.

‘Mga halas ngan katulinan han mga halas!’ an tawag ni Jesus ha mga lider han relihiyon. Ngan nagsiring hiya nga sisirotan hira han Dios tungod han ira magraot nga buhat. Katapos hito, sinagka hi Jesus ha Bukid han mga Olibo, ngan ini nga upat nga apostol nagpakiana ha iya. Maaram ka ba kon ano an ira iginpakiana?

Nagpakiana hira mahitungod han mahitatabo ha tidaraon. Maaram hira nga wawad-on ni Jesus an ngatanan nga karaotan ha tuna. Kondi karuyag nira hibaroan kon san-o ito mahitatabo. San-o mabalik hi Jesus basi magmando sugad nga Hadi?

Maaram hi Jesus nga ha iya pagbalik, diri hiya makikita han iya mga sumurunod dinhi ha tuna. Tungod kay aadto hiya ha langit, ngan diri nira makikita hiya didto. Salit, ginsumatan ni Jesus an iya mga apostol han pipira nga mahitatabo ha tuna kon magmando na hiya sugad nga Hadi ha langit. Ano an pipira hini?

Siring ni Jesus nga magkakaada hin dagku nga girra, damu an magkakasakit ngan magugutom, magtitikaraot gud an krimen, ngan magkakaada magkusog nga linog. Siring liwat ni Jesus nga an maopay nga sumat han ginhadian han Dios isasangyaw ha bug-os nga tuna. Nakikita ba naton nga nahitatabo ini yana? Oo! Salit sigurado kita nga nagmamando na yana hi Jesus ha langit. Diri na mag-iiha, wawad-on niya an ngatanan nga karaotan ha tuna.