Tantara 98

Jesosy Tan̈abon’ny Bongo Oliva

IO JESOSY tan̈abon’ny Bongo Oliva. Apostolinany efatra miaraka aminany io: Andrea ndreky Petera mpirahalahy, baka iô Jakoba ndreky Jaona, mpirahalahy koa. Tempolin’ny Zan̈ahary ta Jerosalema hitanao lavidavitry irỳ.

Aroe andra tamy zen̈y Jesosy niditry ta Jerosalema, nitenginy zanaka boriky in̈y. Talata andra tamin’io. Mbala maraindrain̈y, Jesosy fa tamy tempoly tao. Mpisôron̈o aby tao tamy zen̈y nitady hanambotro Jesosy, baka iô hamono izy. Irô fo navozo, fôtony naro olo tia Jesosy.

Jesosy nikaiky mpitaondra fivavahan̈a aby io: ‘Eh bibilava aby taranaka menalio ty!’ Jesosy nivolan̈a fa hisazin’ny Zan̈ahary irô, fôtony maro loatra raha ratsy nataon-drô. Jesosy amy zay nandeha tan̈abon’ny Bongo Oliva, ke tan̈y apostolinany efatra aby in̈y nan̈ontany raha izy. Hainao raha nan̈ontanian-drô Jesosy?

Apostoly aby io nan̈ontany izy mikasiky raha mbala hoavy. Irô nahay fa Jesosy han̈adoso raha ratsy jiaby amy tany ty. Irô fo ti hahay ombian̈a raha zen̈y avy. Ombian̈a ma Jesosy manjary Ampanjaka, ke himpody ndreky?

Jesosy nahay fa mpianatranany aby io tsy hahita izy, lera izy himpody ndreky. Irô tsy hahita izy, fôtony izy amy zen̈y an-dan̈itry an̈y. Ke Jesosy nivolan̈a tamin’apostolinany aby io raha jiaby hoavy ambony tany, lera izy Ampanjaka an-dan̈itry an̈y. Ino sasany amy raha aby zen̈y?

Jesosy nivolan̈a fa hisy lagera, ho maro olo marary ndreky mosary, olo hahaikafiry fo, baka iô koa hisy hôrohôron-tany. Jesosy koa nivolan̈a fa hambara amy tany jiaby misy olo mipetraka vaovao tsara mikasiky fanjakan̈an’ny Zan̈ahary. Mba misy amin’andratsika ziôty edy raha jiaby zen̈y? Ia! Zen̈y mahavy atsika matoky tsarabe fa Jesosy iziô efa manjaka an-dan̈itry an̈y. Teteky iô, izy han̈adoso raha ratsy jiaby amy tany ty.

Matio 21:46; 23:1-39; 24:1-14; Marka 13:3-10.