Historia 98

Jesús zuba lu dani Olivo

NDIʼ nga Jesús ne zúbabe lu ti dani láʼ Olivo. Guidapaʼ hombre nuuné laabe nga ca apóstol stibe. Andrés ne biʼchiʼ, Pedru, Jacobo ne biʼchiʼ, Juan. Yoo roʼ ni ruuyuʼ zitu de laacabe ca nga yuʼduʼ stiʼ Dios ndaaniʼ guidxi Jerusalén.

Maʼ gudiʼdiʼ chupa gubidxa dede dxi guyuu Jesús dxiʼbaʼ deche burruhuiiniʼ que ndaaniʼ guidxi Jerusalén. Maʼ martes ndiʼ, peru caadxi dxi ante la? Jesús guyuube ndaaniʼ yuʼduʼ que, ne raqué ca ni ruzaaquiʼ guʼxhuʼ que gucaláʼdxicaʼ ninaazecaʼ laabe para ñuuticaʼ laabe. Peru bidxíbicabe, purtiʼ ca binni que nuucaʼ pur Jesús.

Jesús rabi ca xaíque stiʼ ca religión que: ¡Beendacaʼ ne xiiñiʼ beendacaʼ! Óraque guniʼbe de que Dios zuni castigar laacaʼ pur guiráʼ ca guendaquéiquiiñeʼ ni maʼ bíʼnicaʼ. Despué gudxiʼbaʼ Jesús lu dani Olivo que ne óraque guidapaʼ apóstol que gunabadiidxacabe laabe. Nannuʼ xi canabadiidxacabe la?

Ca apóstol ca canabadiidxacabe de cani chiguizaaca. Nánnacabe de que Jesús zunitilú guiráʼ guendaquéiquiiñeʼ ni raca lu Guidxilayú. Peru racaláʼdxicabe gánnacabe padxí gaca ni. Padxí gueeda Jesús sti biaje para guni gobernar casi Rey yaʼ.

Jesús nanna de que ca xpínnibe de Guidxilayú riʼ qué zanda diʼ gúʼyacaʼ laabe ora gueedabe sti biaje, purtiʼ laabe ziuube guibáʼ ne laacaʼ qué zanda diʼ gúʼyacaʼ laabe. Nga runi, Jesús rábibe ca apóstol stibe caadxi de cani zaca lu Guidxilayú riʼ ora laabe maʼ guni reinarbe guibáʼ. Gunáʼ nga caadxi de laaca ni yaʼ.

Jesús na de que ziuu guendaridinde guidxi ne sti guidxi, ne stale binni zaca huará ne zandaana, ne ziuu guendaruuti, ne stale xu roʼ. Ne nabe de que ca diidxaʼ nacubi ne galán stiʼ reinu stiʼ Dios zareeche ni guidubi naca Guidxilayú. Huayúʼyanu cani ca dxi stinu ri la? ¡Huayúʼyanu pue! Dxandipeʼ nga nánnanu de que Jesús maʼ cayuni mandar guibáʼ. Qué zandaadiʼ zunduuxebe guiráʼ ca guendaquéiquiiñeʼ ni nuu lu Guidxilayú riʼ.

Mateo 21:46; 23:1-39; 24:1-14; Marcos 13:3-10.