LIGBI enyɔ ba be, nɛ amlɔ nɛ ɔ e su So gbɔkuɛ. Yesu kɛ e bɔfo 12 ɔmɛ ba hiɔwe tsu ngua nɛ ɔ mi konɛ a ba ye Hetsɔmi niye ní ɔ. Nyumu ɔ nɛ o na nɛ e yaa a ji Yuda Iskariot. E yaa tsɔɔ osɔfo ɔmɛ bɔnɛ a maa pee ha konɛ a nine nɛ su Yesu nɔ.

Yuda ya osɔfo ɔmɛ a ngɔ Sɔ, nɛ e ya bi mɛ ke: ‘Ke i ye bua nyɛ nɛ nyɛ nu Yesu ɔ, mɛni nyɛ ma ha mi?’ A ha lɛ heto ke: ‘Wa ma ha mo sika hiɔ nyingmi etɛ.’ Lɔɔ he ɔ, amlɔ nɛ ɔ, Yuda yaa ni ɔmɛ a ngɔ konɛ e nyɛɛ a hɛ mi kɛ ba Yesu ngɔ. Anɛ pi yiwutso ní peepee ji nɛ ɔ lo?

A ye Hetsɔmi niye ní ɔ ta. Se Yesu ha nɛ a kpale ye niye ní kpa ko nɛ́ ngɛ slɔɔto. E ngɔ abolo kɛ ha e kaseli ɔmɛ nɛ e de ke: ‘Nyɛ he nɛ nyɛɛ ye, ejakaa enɛ ɔ daa si kɛ ha ye nɔmlɔtso.’ Kɛkɛ nɛ e ngɔ wai kɛ kplu hu nɛ e de ke: ‘Nyɛ he nɛ nyɛɛ nu, ejakaa enɛ ɔ daa si kɛ ha ye muɔ nɛ a ma plɛ kɛ pue si ngɛ nyɛ he ɔ.’ Baiblo ɔ tsɛɛ enɛ ɔ ke, ‘Nyɔmtsɛ ɔ gbɔkuɛ nya si niye ní,’ aloo ‘Nyɔmtsɛ ɔ niye ní.’

Israelbi ɔmɛ yeɔ Hetsɔmi ɔ, nɛ a kɛ kaiɔ benɛ Mawu bɔfo ɔ ‘tsɔ’ a we ɔmɛ a he kɛ be ngɛ Mizraim nɛ e gbe bitɛtehi ngɛ Mizraimbi a wehi tsuo a mi ɔ. Se jehanɛ ɔ, Yesu ngɛ hlae nɛ e se nyɛɛli ɔmɛ nɛ kai lɛ ngɛ bɔnɛ e ngɔ e wami kɛ ha ngɛ a he ɔ heje. Enɛ ɔ heje nɛ e de mɛ kaa a ye niye ní slɔɔto nɛ ɔ daa jeha a nɛ.

Benɛ a ye Nyɔmtsɛ ɔ Gbɔkuɛ Nya Si Niye Ní ɔ ta a, Yesu de e bɔfo ɔmɛ ke a pee kã nɛ́ a hemi kɛ yemi mi nɛ wa. Nyagbe ɔ, a la yi jemi la ha Mawu, kɛkɛ nɛ a je kpo. Amlɔ nɛ ɔ, je jɔ saminya, eko ɔ, nyɔ mi kpɛti be. Ha nɛ waa hyɛ he nɛ a ho.