APA ninshi napapita inshiku shibili, nomba ni pali cine ubushiku. Yesu na batumwa bakwe 12 baile muli uyu muputule uukulu uwali pa mulu ukuti e mo baliile ica Kucilila. Uyu mwaume ulemona pa cikope uulefuma mu muputule, ni Yuda Iskariote. Aleya mukweba bashimapepo ifya kwikata Yesu.

Ubushiku bwafumineko, Yuda aile mu kwipusha bashimapepo ati: ‘Finshi mukampeela nga namwafwa ukwikata Yesu?’ Nabo batile: ‘Tukakupeela indalama sha silfere 30.’ E fyo Yuda aimine no kuya kuli bashimapepo pa kuti abalange ukwali Yesu. Ico acitile calibipile sana, bushe te ifyo?

Ilyo bapwile ukulya ica Kucilila, Yesu na batumwa batendeke ukulya ica kulya na cimbi icaibela. Apeele abatumwa bakwe umukate e lyo atila: ‘Uyu mukate cimpashanya ca mubili wandi, uulepeelwa pa mulandu wenu, buuleni mulye.’ Kabili abapeele kapu umwali umwangashi e lyo atila: ‘Nweni umwangashi uyu, pantu cimpashanya ca mulopa wandi uuli no kusuuma pa mulandu wenu.’ Ifi ifyacitike apa, e fyo Baibolo ita ati: ‘Umulaalilo wa kwa Shikulu.’

Abena Israele balelya ica Kucilila pantu calebebukisha ifyo malaika ‘aciliile’ amayanda yabo mu Egupti no kwipaya amabeli mu mayanda ya bena Egupti. Lelo apa Yesu alefwaya abasambi bakwe bakalemwibukisha, baleibukisha ne fyo apeele ubumi bwakwe pa mulandu wabo. E co abebeele ukulasefya Umulaalilo cila mwaka.

Pa numa ya kulya Umulaalilo wa kwa Shikulu, Yesu aebele abatumwa bakwe ukuti bafwile ukushipa no kukwata icitetekelo cakosa. Na mu kulekelesha baimbiile Lesa inyimbo e lyo baya. Apa ninshi nabwila sana, nalimo pali pa kati bushiku. Natumone uko baile.