Sankanso soba dɔ kɔnɔ
Maana 99nan
Sankanso soba dɔ kɔnɔ
TILE fila tɛmɛnen kɔfɛ, alamisadon sufɛ, Yesu ni a ka ciden 12 nana nin soba kɔnɔ sankanso la walisa ka Tɛmɛnkan seli dumuni kɛ. I ɲɛ bɛ cɛ min taatɔ la, o ye Juda Isikariɔti ye. A taara a fɔ sarakalasebagaw ye, u bɛ se ka Yesu minɛ cogo min na.
Tile kelen o don ɲɛ, Juda taara sarakalasebagaw fɛ ka nin kuma fɔ u ye: ‘Aw bɛna mun di ne ma, ni ne ye aw dɛmɛ ka Yesu minɛ?’ U ko: ‘Warijɛ bisaba.’ O kosɔn Juda bɛ taa u fɛ sisan walisa ka Yesu yɔrɔ jira u la. Yala o tɛ kojuguba ye wa?
Tɛmɛnkan seli dumuni kɛra kaban. Nka Yesu ye dumuni wɛrɛ ko sigi sen kan. O tun ye dumuni kɛrɛnkɛrɛnnen dɔ de ye. A ye nburukun dɔ ta ka a di a ka cidenw ma, k’a fɔ u ye ko: ‘Aw ye nin dun bawo nin ye ne farikolo bisigi ye min bɛna di aw kosɔn.’ A tilala ka jifilen dɔ ta, diwɛn tun bɛ min
kɔnɔ, k’o fana di u ma, k’a fɔ ko: ‘Aw ka nin min, bawo nin ye ne joli bisigi ye min bɛna bɔn aw kosɔn.’ Bibulu bɛ o dumuni wele ko ‘Matigi ka fana’Israɛlkaw tun bɛ Tɛmɛnkan seli dumuni kɛ walisa k’u hakili jigin a la ko tuma min na Ala ka mɛlɛkɛ ‘tɛmɛna’ olu ka sow kunna Misira, a ye Misirikaw ka du kelen-kelen bɛɛ den fɔlɔ faga. Nka sisan, Yesu b’a fɛ a nɔfɛmɔgɔw hakili ka jigin ale la ani a ye a ka ɲɛnamaya di u kosɔn cogo min na. O de y’a to Yesu y’a fɔ u ye ko u ka o dumuni kɛrɛnkɛrɛnnen ko kɛ san o san.
U tilalen kɔ Matigi ka fana dumuni na, Yesu y’a fɔ a ka cidenw ye ko u kana siran, u ka fanga sɔrɔ dannaya la. O kɔfɛ, u ye dɔnkiliw da Ala ye ka bɔ ka taa. Su tun janfara kosɛbɛ. A bɛ i ko miniwi tun tɛmɛna kaban. An k’a lajɛ u taara yɔrɔ min na sisan.
Matiyu 26:14-30; Luka 22:1-39; Yuhana tilayɔrɔba 13nan ka n’a bila 17nan na; 1 Kɔrɛntekaw 11:20.