ATU cu ni hnih hnu cacawn nili ni ah a si. Jesuh le a lamkaltu 12 hna cu Lanhtak Puai ei awk ah hi cung dot khaan kaupi chung ah an hung phan. Khi ka i a chuak lio mipa nan hmuh mi cu Judas Iskariot a si. Amah cu Jesuh an tlaih khawh nak hnga chimh awk ah tlangbawi hna sin i a kal lio a si.

Cu hlan nikhat ah Judas cu an sin ah a kal i: ‘Jesuh kan tlaihter hna ahcun zeidah nan ka pek lai?’ tiah a hal hna. Annih nih: ‘Ngun tangka phar sawmthum,’ an ti. Cucaah Judas cu atu ah khi mi hna sin ah Jesuh sin i a hruai khawh nak hnga a kal. Cucu tuksapur thil a si lo maw?

Lanhtak Puai cu a dih. Sihmanhsehlaw Jesuh nih a dang rawl danghnak puai a thokpi ṭhan hna. Alamkaltu pawl kha changreu tlangkhat a chanh hna i: ‘Ei tuah u, zeicahtiah hi cu nanmah caah ka pek lai mi ka pum a si,’ a ti hna. Cun mitsur hang hrai kha a chanh ṭhan hna i: ‘Ding tuah u zeicahtiah hi cu nanmah ca i ka thlet hnga mi ka thi a si,’ a ti hna. Hi cu Baibal nih ‘Bawipa zanriah,’ tiah a ti.

Israel mi hna nih Lanhtak Puai rawl cu Pathian vancungmi nih Izipt ram ah an inn hna kha a ‘lanh tak’ i, Izipt mi hna inn ah fater vialte a rak thah lio hna philhlonak caah an ei tawn. Sihmanhsehlaw atu cu a zultu hna kha amah le an ca i a nunnak a peknak kha hngal zungzal hna seh ti a duh. Cucaah kum fate hi a bik in zanriah einak puai cu tuah lengmang awk ah a chimh hna.

Bawipa zanriah cu an ei dih hnu ah, Jesuh nih a lamkaltu hna cu zumhnak lei ah ralṭhat awk le ṭhawn awk ah a chimh fawn hna. A donghnak ah Pathian thangṭhatnak hla an sak i an chuak. Atu cu khua a tlai i, zantim hrawng a si cang. Khoikadah an kal zoh u sih.