SA SIVI e rua na siga, e bogi ni Lotulevu oqo. Ratou mai soqovata oqo o Jisu kei iratou na 12 na yapositolo ena dua na tabavale e cake me ratou vakayagataka kina na kakana ni Lakosivia. O Jutasa Isikarioti e curu tiko oqori i tuba. Ena lai tukuna vei ira na bete na sala mera vesuki Jisu kina.

Ena siga Vukelulu, a lako yani o Jutasa vei ira na bete qai taroga: ‘A cava dou na solia vei au keu vukei kemudou mo dou vesuki Jisu?’ Era kaya: ‘Tolusagavulu na tiki ni siliva.’ Sa vakarau lai sota sara tiko ga oqori o Jutasa kei ira na bete me rawa ni kauti ira mai vei Jisu. Sa dua dina na ka torosobu, se vakaevei?

Sa oti na kanavata ni Lakosivia, ia e tekivuna o Jisu e dua tale na kanavata lavotaki. E solia vei ratou na yapositolo e dua na ibuli madrai qai kaya: ‘Dou kania, oqori e kena ibalebale na yagoqu ena soli ena vukumudou.’ Sa qai solia tale ga vei iratou na bilo waini qai kaya: ‘Dou gunuva, oqori e kena ibalebale na noqu dra ena dave ena vukumudou.’ E vakatoka na kanavata oqo na iVolatabu, me ‘ivakayakavi ni Turaga.’

Era daunanuma lesu na Isireli ena gauna era kania kina na kakana ni Lakosivia na nodra ‘lako sivia’ na agilosi ni Kalou na nodra veivale mai Ijipita, ra qai vakamatei ira ga na ulumatua ni Ijipita. Ia oqo e vinakata o Jisu me ratou dau nanumi koya na nona imuri ni a solia na nona bula ena vukudratou. Oya na vuna e kaya kina vei iratou me ratou dau cakava ena veiyabaki na kanavata oqo.

Ni oti na iVakayakavi ni Turaga, sa qai kaya o Jisu vei iratou na yapositolo me ratou yaloqaqa, me ratou tudei ena vakabauta. Eratou tinia ena nodratou lagata e dua na sere vua na Kalou, ratou qai lako yani. Sa via bera sara toka oqo, ni sa bogilevu tutu beka. Meda raica mada na vanua eratou lako kina.