DINA rua murinai, hari be Thursday hanuaboi. Iesu bona ena aposetolo taudia 12 be inai atai daiutu badana dekenai idia hebou Pasova idia ania totona. Daiutu ia rakatania noho tauna be Iuda Iskariote. Ia be hahelaga taudia dekenai ia lao noho Iesu dogoatao dalana ia karaia totona.

Varani, Iuda be idia dekenai ia lao bona ia nanadaidia: ‘Lau dekenai dahaka do umui henia bema Iesu abia totona umui lau durua?’ Idia gwau: ‘Siliva moni 30.’ Unai dainai, hari Iuda ia lao unai tatau ia hedavari henia totona, unai amo Iesu dekenai ia hakaudia lao diba. Unai be dika herea, ani?

Pasova anianina ia ore. To Iesu ese hari mai anina bada aniani ma ta ia hamatamaia. Iena aposetolo taudia dekenai paraoa ta ia henia bona ia gwau: ‘Umui ania, badina ena anina be egu tauanina umui dainai do lau henia!’ Bena idia dekenai uaina kapusi ta ia henia, bona ia gwau: ‘Umui inua, badina ena anina be egu rara, umui dainai do lau bubua.’ Baibel ese unai ia gwauraia ‘Lohiabada ena anibou.’

Israela taudia be Aigupito dekenai idia noho neganai, Dirava ena aneru ese edia ruma ‘ataiai ia hanaia,’ to Aigupito taudia edia vara guna natudia ia alaia, unai nega laloatao totona Pasova idia ania. To hari Iesu ia ura ena hahediba taudia ese ia bona idia dainai ena mauri ia henia dalana idia laloatao. Bona unai dainai idia ia hamaoroa lagani ta ta ai inai mai anina bada aniani do idia karaia.

Lohiabada ena Anibou idia ania murinai, Iesu ese ena aposetolo taudia ia hamaoroa do idia gari lasi bona abidadama dekenai do idia goada. Dokonai, Dirava dekenai ane idia abia bena unai gabu idia rakatania. Inai be hanuaboi momokani, reana hanuaboi 12 o’klok ia hanaia vadaeni. Idia lao gabuna mani ita itaia.