Jesus novaapostele ve ve ri metuwo rokombanda
EHUNGI 99
Jesus novaapostele ve ve ri metuwo rokombanda
NAI ya ri ouṱuku waRitjaine, omayuva yevari kombunda yaindu Jesus novaapostele ve vane tji va ri kOndundu yOmiṋinga. Jesus novaapostele ve 12 ve ya ketuwo enene rokombanda ndi okurya eriro rOpaska. Omurumendu ngu mo munu ama piti pomuvero oJudas Iskariot. Eye ma i okukaraera ovapristeri kutja mave yenene vi okukambura Jesus.
Eyuva nda kapita, Judas wa ire ku wo ne ve pura kutja: ‘Eṋe mamu ndji pe tjike indu ami tji mbe mu vatere okukambura Jesus?’ Owo va tja: ‘Ovimariva ovisilveri omirongo vitatu.’ Okutja Judas wa ri mondjira okukahakaena novarumendu mba kutja me ve tware ku Jesus. Iho katjiṋa otjivi nao?
Eriro rOpaska ra manuka. Nungwari Jesus wa uta eriro rarwe rapeke. Eye wa yandja omboroto kovaapostele ve na tja: ‘Ryee, orondu ihi matji heye orutu rwandje ndu maru yandjerwa eṋe.’ Okuzambo eye we ve pa otjinwino tjomavinu na tja: ‘Nwee, orondu ihi matji heye ombinḓu yandje ndji mai tirahirwa eṋe.’ Ombeibela eriro ndi i isana kutja ‘Omariro omayapuke waMuhona.’
Ovaisrael aave ri eriro rOpaska okuvezemburukisa ohunga na indu omuengeli waMukuru tja ‘kapita kombanda’ yozondjuwo zawo mu Engipte, nungwari a zepa omaveri mozondjuwo zOvaengipte. Nungwari nai Jesus aa vanga kutja ovahongewa ve ve mu zemburuke, nokuzemburuka omuano eye mbwa yandja omuinyo we mena rawo. Nu mena ranao eye opa zokuveraera kutja ngave zemburuke eriro rapeke ndi ombura aihe.
Tji va za nokurya Omariro omayapuke waMuhona, Jesus wa raera ovaapostele ve kutja ngave rire ozombanḓe novanamasa mongamburiro. Korusenina, owo va imbura omaimburiro ku Mukuru nave i. Nai kwa ri akwa toko, ngahino ya ri kombundomokati kouṱuku. Indjeye tu tare kutja owo va ya pi.
Mateus 26:14-30; Lukas 22:1-39; Johanes ekondwa 13 ngandu kekondwa 17; 1 Ovakorinte 11:20.
