NỌ EDẸ ivẹ evrẹ no, u te te aso Edene ẹkpoka. Jesu avọ ikọ 12 riẹ a tẹ nyaze ubruwou ulogbo egediege ọnana re a re emu Ọnyavrẹ. Ohwo nọ whọ ruẹ nọ ọ be nya vrẹ na yọ Judas Iskariọt. Ọ be nya i dhesẹ kẹ izerẹ na epanọ a re ro kru Jesu.

Whaọ odẹ nọ ukpo, Judas ọ nya bru’ae ọ tẹ nọ: ‘Eme wha rẹ kẹ omẹ otẹrọnọ me fiobọhọ kẹ owhai mu Jesu?’ A tẹ ta nọ: ‘Ọgbubiu- gho idọlọ efuafo.’ Fikiere kọ obọ ahwo ọyena Judas ọ rẹ nya na re osua’i kpobọ Jesu. Kọ oyena u gbe gbunu dede?

A re emu Ọnyavrẹ na no. Rekọ Jesu ọ tẹ tuọ emu ọfa oghẹresa họ. Ọ rehọ ukulu ebrẹdi kẹ ikọ riẹ ọ tẹ ta nọ: ‘Wha riẹe, keme otọ onana họ oma mẹ nọ a be te rehọ kẹ owhai.’ Kẹsena ọ tẹ rehọ egho udi kae ọ tẹ ta nọ: ‘Wha dae, keme otọ onana họ azẹ mẹ, ọnọ o bi ti hwẹ fiki rai.’ Ebaibol ise ọnana nọ ‘emu-owọwọ Ọnowo na,’ hayo ‘emu Ọnowo na.’

Ahwo-Izrẹl a re emu Ọnyavrẹ re okareghẹ hae okenọ ẹnjẹle Ọghẹnẹ ọ rọ ‘nya vrẹ’ iwou rai evaọ obọ Ijipti, rekọ o te kpe ọmọ ọtuyẹ evaọ iwou Ahwo-Ijipti. Rekọ enẹna Jesu ọ gwọlọ nọ ilele riẹ a kareghẹ hiẹe, gbe epanọ ọ rọ kae uzuazọ riẹ. Kọ oye osoriẹ nọ ọ jẹ ta kae nọ a he ru eha emu oghẹrẹsa nana kukpe kukpe.

Nọ a re Emu Owọwọ Ọnowo na no, Jesu ọ tẹ ta kẹ ikọ riẹ re a wharo jẹ ga evaọ orọwọ. Ukuhọ riẹ, nọ a suọ ile kẹ Ọghẹnẹ no a te kpo. Oke orro raha no, otubẹ vrẹ udevie aso no. J’oma rri obonọ a kpohọ.