Ngewa ya 99: Me Nyũmbanĩ ya Ĩũlũ Ngolovanĩ
YU NĨ wa Kana wĩoo, mĩthenya ĩlĩ ĩtina. Yesũ na amanyĩw’a make 12 nĩmookie nyũmbanĩ ĩĩ nene yĩ ĩũlũ ngolovanĩ maye Kyaũya kya Vasaka. Mũndũ ũsu ũkwona aumaalĩte nĩ Yutasi Isikalioti. Aendete kũtavya athembi ũndũ matonya kũmũkwata Yesũ.
O mũthenya ũmwe mũvĩtu, Yutasi anaendie vala maĩ na amakũlya: ‘Mũkanenga kyaũ ethĩwa ngamũtetheesya kũmũkwata Yesũ?’ Namo masya: ‘Ilungu mĩongo ĩtatũ sya vetha.’ Kwoou Yutasi yu aendete akonane na andũ asu nĩ kana amatongoesye nginya vala ve Yesũ. Ũsu nĩ ũndũ mũthũku mũno.
Mamina kũya Vasaka, Yesũ nĩwambĩĩe kyaũya kĩngĩ kya mwanya. Nĩwamanengie atũmwa make mũkate na amea: ‘Ũyei, nũndũ ũũ wĩonany’a mwĩĩ wakwa ũla ũkanenganwe nũndũ wenyu.’ Na ĩndĩ amanenga kĩkombe kya ndivai na amea: ‘Nyw’ai, nũndũ ĩno yĩonany’a nthakame yakwa, ĩla ĩĩtĩkw’a kwondũ wenyu.’ Mbivilia ĩkĩtaa ‘kyaũya kya wĩoo kya Mwĩaĩi.’
Aisilaeli maĩsaa Vasaka nĩ kana ĩmalilikany’e yĩla mũlaĩka wa Ngai ‘wakĩlile’ nyũmba syoo me Misili, ĩndĩ oaa makithathi ma nyũmba sya Amisili. Ĩndĩ yu Yesũ eenda aatĩĩi make mamũlilikanae we, na ũndũ wanenganie thayũ wake kwondũ woo. Na kĩu nĩkyo kĩtumi ũkũmea malilikanae kyaũya kĩu kya mwanya kĩla mwaka.
Ĩtina wa Kyaũya kya Wĩoo kya Mwĩaĩi, Yesũ nĩweeie atũmwa make nĩmethĩwe na ũkũmbaũ na mũĩkĩĩo wĩna vinya. Ĩtina vyũ, nĩmainĩie Ngai mbathi na mathi. Kwaĩ ũtukũ mũno, ta mbee wa ũtukũ katĩ. Ekai twone vala maendie.
Mathayo 26:14-30; Luka 22:1-39; Yoana kĩlungu kya 13 nginya 17; 1 Akolintho 11:20.
Makũlyo
- O tondũ vonanĩtw’e visanĩ, nĩkĩ Yesũ na atũmwa make 12 me nyũmbanĩ nene ngolovanĩ ĩũlũ?
- Mũndũ ũũ umaalĩte nũũ, na aendete kwĩka ata?
- Yesũ ambĩlĩĩilye kyaũya kĩva kya mwanya ĩtina wa kyaũya kya Vasaka?
- Vasaka yalilikanasya Aisilaeli ũndũ mwaũ, nakyo kyaũya kĩĩ kya mwanya kĩlilikanasya aatĩĩi ma Yesũ kyaũ?
- Ĩtina wa Kyaũya kya Wĩoo kya Mwĩaĩi, Yesũ amatavisye aatĩĩi make ata, namo meekie ata?
Makũlyo ma kwongeleela
- Soma Mathayo 26:14-30.
Mathayo 26:15 yĩonany’a ata kana Yutasi amũvũnyanĩie Yesũ kwa ngenda?
Nthakame ya Yesũ ĩla yetĩkie yeanĩisye maũndũ elĩ meva? (Mt. 26:27, 28; Yel. 31:31-33; Aev. 1:7; Aevl. 9:19, 20)
- Soma Luka 22:1-39.
Nĩ kwa nzĩa yĩva Satani wamũlikile Yutasi? (Lk. 22:3; Yoa. 13:2; Meko 1:24, 25)
- Soma Yoana 13:1-20.
Kwosana na ũvoo ũla wĩ nthĩnĩ wa Yoana 13:2, Yutasi nũtonya kũtalĩlwa mavĩtyo nĩ ũndũ weekie, namo athũkũmi ma Ngai matonya kwĩmanyĩsya ĩsomo yaũ kũmana na ũndũ ũsu? (Mwa. 4:7; 2 Ako. 2:11; Aka. 6:1; Yak. 1:13, 14)
Yesũ amanyĩisye ũndũ mwaũ wa vata kwa nzĩa ya meko? (Yoa. 13:15; Mt. 23:11; 1 Vet. 2:21)
- Soma Yoana 17:1-26.
Yesũ avoyeie aatĩĩi make methĩwe “me ũmwe” kwa nzĩa myaũ? (Yoa. 17:11, 21-23; Alo. 13:8; 14:19; Ako. 3:14)
No Wendeewʼe Nĩ Ii
YESŨ NĨWE NZĨA, NĨWE W’O, NĨWE THAYŨ
Kyaũya kya Wĩoo kya Mwĩaĩi
Yesũ nĩwambĩĩisye mũvango wa kũlilikana kĩkw’ũ kyake kĩla aatĩĩi make malilikanaa kĩla mwaka matukũ 14, mwei wa Nisani.
