JAJINGA juba ja pa Kina bufuku, panyuma ya kupitapo moba abiji. Yesu ne batumwa banji 12 baishile ku ino nzubo ikatampe ya peulu mu kuja kijiilo kya Lupitailo. Awe mwanamulume ye wamona ubena kulupuka ke Yudasa Isakaliota. Wayilenga na kwambila bañanga bya kumukwata Yesu.

Jino juba saka jikyangye kufika, Yudasa wayile ko baji ne kwibepuzha’mba: ‘Ki ka kyo mukampa umvwe nemukwasha kukwata Yesu?’ Baambile’mba: “Ndalama makumi asatu.” Onkao mambo, Yudasa wayilenga na kumona bano banabalume kuba’mba ebatwale kwi Yesu. Nanchi kino kechi kyatamine nenyi?

Kijiilo kya Lupitailo kyapwile. Bino Yesu watendekele kijiilo kikwabo kiikajila. Wapele batumwa banji shinkwa ne kwamba’mba: ‘Jai, mambo kino kibena kulumbulula mubiji wami ukemupainwa anweba.’ Kabiji wibapele ne kapu wa binyu ne kwamba’mba: ‘Tomai, mambo kino kibena kulumbulula mashi ami akemwichikila anweba.’ Baibolo utela kino amba: ‘Kijiilo kya Nkambo kya mabanga.’

Bena Isalela bajanga Kijiilo kya Lupitailo kibavululangamo kimye malaika wa Lesa kyo ‘apitaijile’ mazubo abo mu Ijipita, ne kwipaya baana babeji mu mazubo abena Ijipita. Pano Yesu wakebelenga baana banji ba bwanga kumuvulukanga kabiji ne byo ebafwijile. Kabiji o ene mambo o ebambijile kuvulukanga kino kijiilo kiikajila pa mwaka pa mwaka.

Pa kupwisha kuja Kijiilo kya Nkambo kya Mabanga, Yesu waambijile batumwa banji kuchinchika ne kwikala bakosa mu lwitabilo. Pa kupwisha, baimbile nyimbo ya kutota Lesa ne kulupuka balupukilemo. Bwaijile bingi kampe kyajinga kimye kya kupitaila pakachi ka bufuku. Pano twaya tumone ko bayile.