Esimwititi 99: Monzugo zekeguru
NGESI Etine masiku, pana piti mazuva gavali. Jesus novapositoli vendi 12 vana wiza konzugo zonene ezi zekeguru va ya lye murarero goPaska. Mugara ogu ono kumona ana ka za kuna kara Judasa Isikalyoto. Age kuna kuza a ka tantere vapristeli asi ngapi omu nava vhura kugwana Jesus.
Ezuva limwe komeho zeyi, Judasa ka zire kwawo nokuvapura asi: ‘Yinke nomu pa nge nsene nani mu vatera mokukwata Jesus?’ Awo tava tanta asi: ‘Yimaliva yosisiliveli nomurongo ntatu.’ Ngesi Judasa kuna kuza nye a ka gwanekere novagara ava yipo a ka va tware kwaJesus. Nani kapisi yininke yoyidona oyo?
Murarero goPaska guna pu. Nye Jesus ta tameke hena murarero nagopeke gokulikarera. Ta tambeke vapositoli vendi mboroto nokutanta asi: ‘Lyeni, morwa eyi kutanta asi rutu rwange, oru vana kugava mwarweni.’ Ta va pe hena nkinda zovhinyu nokutanta asi: ‘Zi nweni, morwa azo kutanta asi honed zange, ezi ngava tjisangera mwarweni.’ Bibeli kwa tumbura eyi asi ‘Murarero gwaHompa.’
Vaisraeli kwa lire Paska zi va diworokese apa muengeli gwaKarunga ga ‘pitakanene’ mambo gawo moEgipite, nye a dipage nombeli nadinye momambo goVaegipite. Nye ngesi Jesus kuna hara asi vasikuli vendi va mu diworoke, nomu ga va gavera mwenyo gwendi. Eyi yiyo nye ga va tanterere asi va dane murarero gokulikarera ogu nkenye mvhura.
Konyima zokulya Murarero gwaHompa, Jesus ta tantere vapositoli vendi va kare noupenda ntani nepuro lyononkondo. Mouhura, tava dimbire Karunga nonsumo, makura tava pwaga. Ngesi lina toko sili, nampo lina piti pokatji komasiku. Tu tareni asi kupi oku vana kuza.
Mateusa 26:14-30; Rukasa 22:1-39; Johanesa magaununo 13 dogoro 17; 1 Vakolinte 11:20.
Mapuro
- Moomu yina kumoneka mefano, morwasinke vana karere oJesus novapositoli vendi 12 monzugo zonene zekeguru?
- Yilye ogu mugara ana kupwaga, ntani yinke ana ka rugana?
- Murarero musinke gokulikerera ana tameke Jesus konyima zomurarero goPaska guna pu?
- Kosihorokwa musinke za diworokesere Paska Vaisraeli, ntani kosinke agu diworokesa murarero ogu gokulikerera vasikuli vaJesus?
- Konyima zoMurarero gwaHompa, yinke ana tantere Jesus vasikuli vendi, ntani yinke nava rugana?
Mapuro gokugwederera ko
- Resa Mateusa 26:14-30.
Ngapi omu azi likida Mateusa 26:15 asi ehororo lyaJudasa lyokuhorora Jesus kwa kere sirugana sowina?
Yitambo yivali musinke lya karera po etjisango honde lyaJesus?
- Resa Rukasa 22:1-39.
Montanto musinke ga hwililire Satana mwaJudasa?
- Resa Johanesa 13:1-20.
Mokutara sihorokwa somwaJohanesa 13:2, kuvhura kupa usima Judasa kweyi ga rugene, ntani yinke nava vhura kulirongera ko vakareli vaKarunga kweyi?
Yisinke ga rongere Jesus kupitira mosihonena sendi?
- Resa Johanesa 17:1-26.
Montanto musinke Jesus ga kanderere vasikuli vendi ‘va lize mutjima gumwe’?
