LUMBU yole yavioka, owau se kia Nya, mu fuku. Yesu ye ntumwa zandi 12 bezidi mun’esuku diantandu mu dia e Nduta. Ndiona ovaikanga i Yuda mwisi Kereote. Wele samuna kwa anganga una balenda bakila Yesu.

Yuda wakiyendela kala kwa anganga yo kubayuvula vo: ‘Nki nukumpana ovo inuyekolwele Yesu?’ Bamvutwidi vo, “palata makumatatu.” Ozevo, o Yuda wele wanana yau mu kubanata kuna kena o Yesu. Nkia mpil’evangu?

Bamene dia e Nduta. Kansi, o Yesu oyantikidi dia kwakaka kwamfunu. Ovene mbolo kw’alongoki andi, oku vo: ‘Nudia yo; ekiaki i to kiame kivaninwa muna kuma kieno.’ I bosi, ubavene mpe e mbungwa a vinyo oku vo: ‘Nunua yo, kadi i menga mame mama mana mebungukila muna kuma kieno.’ Nkand’a Nzambi uyikilanga wo vo ‘Nlekelo a Mfumu.’

Aneyisaele badianga e Nduta muna kubasungamesa vo o mbasi a Nzambi “walut’e” nzo zau muna Engipito kansi, wavonda mwan’antete muna nzo za Angipito. Kansi, o Yesu wazola vo alongoki andi basungamena evangu kevanga, dia vana moyo andi mu kuma kiau. Muna kuma kiaki, wabakanikina badianga elambu diadi diamfunu konso mvu.

Vava bamana dia Nlekelo a Mfumu Yesu wavovesa alongoki andi bakala yo unkabu ye lukwikilu lwasikila. Bayimbidi nkunga, bavaikidi. Se fuku kikilu, nanga tezo kia dingidingi. Yambula twatala kuna bayenda.