Erini Ovuzu Joa Gorofa Si Ri
A’DIKO 99
Erini Ovuzu Joa Gorofa Si Ri
’DI RI di o’du Su ma inisi. Yesu pi ba erini ti opele 12 ’diyi be ngaki fi jo gorofa ru ri ma alea ’bua ’dale Omu Agaza ’Ba Drilea si ri nyazu. Agu mini ne fu pi amve ’da i Yuda Isikariota i. Eri mu lu atalo ni ecoki Yesu ni bi ngoni ruari.
Aje ’dini, Yuda Isikariota mu atalo diki zi kini: ‘Emi nga mani a’du fe aka emi aza ko Yesu ni ebizu ria?’ Omvi ki dini: ‘Ama nga mini silingi fe kali na.’ Ani Isikariota ni bani di mu ’ba ’diki eji Yesu ni bizu. ’Da ovuni eyo azi onzi ’dinile ni ku ada ya?
Ondre ta Agazu ’ba driasi ri de di i ’bo. Yesu nga vini nyaka azi ndu ni e’do ’ba ti opele ’diyi be. Nga mukati ’du fe eyi dri ’yo kini: ‘Emi nya, ’diri ma rua mani owile emi si ri.’ Nga vini okele ’du vino be alea nia ’yo kini: ‘Imvu ki, ’diri ari mani mani ada emi si ri i.’ Biblia omve nyaka di i ‘Ondre ta opi ni ri.’
Omu Agazu ’ba drilea siri anzi Israeli ni ki ega e’yo ndra malaika Munguni ri ni agupi anzi oko Misiria ’diyi ki olizu dria, te aga jo anzi Isiraelini ma driasi ri ma eyo si. Te sawa ’disi Yesu le di ’ba i ma vuti bipi ’diyi ma ega ki e’yo ini ima idri owizu eyisiri. ’Da i bani asisile erini lezu ’ba ma ega ondre ta i ni ’di ma eyo eli dria si ri.
Eyini Ondre ta opi niri nyazu ’bori ma vutia, Yesu nga ’yo ’ba erini ti opele ’diyi ma ovu orikokoru azini okporu a’itasi. Asizu nga ki di ongo ngo Mungu dri vutinia ereki di eyi. Te sawa ’disi sa ali di ini ni azia ma drilea ‘bo. Ani ane ki nga ’ba nde ’diyi mu ki ngoa ri.
Matayo 26:14-30; Luka 22:1-39; Yohana caputa 13 kpere 17; 1 ’Ba Korintoa ’Diyi 11:20.
