TOJ jueves te qonikʼen pon Jesús kyukʼex 12 t-apóstol, ex e jax tuj kwart lu tuʼn kywaʼn tiʼj wabʼj toj Xjan Qʼij. Aju tzʼelpen ttzi ja atzun Judas Iscariotejo. Ma txiʼ qʼamalte kye pal tzeʼn jaku tzyet Jesús kyuʼn.

Tuj qʼij otaq tzikʼ, otaq txi tqʼamaʼn Judas kye: ‹¿Alkye ktzajel kyqʼoʼne weye qa ma txi nqʼoʼne Jesús toj kyqʼabʼe?› ‹Kxel qqʼoʼne 30 saq pwaq›, che chi pal te. Atzun jaʼle ma txiʼ Judas kyukʼil tuʼntzun kyxi tiʼn jatumel taʼ Jesús. ¿Tzaʼn nela tuj twitze ajo bʼant tuʼn Judas?

Tej kybʼaj waʼn tuj Xjan Qʼij. E waʼn juntl maj tiʼj juntl wabʼj te qale aju nim toklen. Xi tqʼoʼn Jesús jun pan kye t-apóstol ex xi tqʼamaʼn kye: ‹Kywanxe jlu, quʼn atzun jun techal nxmilale jlu›. Ax ikx tzaj ttzyuʼn jun vas tkuʼx vino tuj xi tqʼoʼn kye, ex tma: ‹Kykʼanxe jlu, quʼn atzen techel nchkʼele jlu, aju kʼelel chitj tuʼn kylaje (kypaje)›. ‹Wabʼj te qale te qAjaw› tbʼi jlu tuʼn Tuʼjil Tyol Dios.

In che wantoq aj Israel tiʼj wabʼj toj Xjan Qʼij, tuʼn tkubʼ kynaʼn aju tej mitiʼ e kubʼ bʼiyoʼn qeju tnejel kykʼwaʼl tuʼn t-anjel Dios tuj Egipto, atzun kye aj Egipto e kubʼ bʼiyoʼn tnejel kykʼwal tuʼn anjel. Atzen te Jesús tajbʼilteq tuʼn tkubʼ naʼn kyuʼn qe t-xnaqʼtzbʼen, ex qa kyim tuʼn kypaj. Tuʼntzunju, in kubʼ ikʼset aju wabʼj lu tkyaqil abʼqʼi.

Tejtzun kybʼaj waʼn tiʼj Wabʼj te qale, xi tqʼamaʼn Jesús kye t-apóstol tuʼn miʼ kytzaj xobʼ ex tuʼn tten qʼuqbʼil kykʼuʼj. E oktzen ten bʼitzel qe bʼitz te qMan Dios ex i el bʼet. Otaqle tzikʼ tmij aqʼbʼel tej tbʼaj jlu. ¿Jaʼtzulo tumel i eʼxa?